18:03, 22 - ماۋسىم 2022 | GMT +6
الاكولدە پويىزدىڭ استىنان ءوتىپ جاتقان تۋريستەر ۆيدەوعا ءتۇسىپ قالدى
نۇر- سۇلتان. قازاقپارات - جالاڭاشكول ستانسياسىنان تۇسكەن تۋريستەردىڭ جۇك پويىزىنىڭ استىنان ءوتىپ جاتقان ۆيدەوسى الەۋمەتتىك جەلىدە تاراپ كەتتى، دەپ حابارلايدى قازاقپارات ءتىلشىسى.
«جالاڭاشكول ستانتسياسىندا جۇك پويىزى تەحنيكالىق تۇراققا جەتكىزىلگەن ەدى. پويىز جولاۋشىلارى قاۋىپسىزدىك تالاپتارىن ورىنداپ، تەمىرجولدان ءتيىستى ەرەجە بويىنشا ءوتۋى كەرەك. سوندىقتان ۆاگونداردىڭ استىنان نەمەسە تىركەمەلەردىڭ ۇستىنە ورمەلەپ شىعىپ وتۋگە بولمايدى. قاۋىپسىزدىك ەرەجەسىن ەلەمەۋدىڭ سالدارى قايعىلى جاعدايلارعا الىپ كەلۋى مۇمكىن»، - دەلىنگەن «قازاقستان تەمۋر جولى» ۇلتتىق كومپانياسى باسپا ءسوز قىزمەتىنىڭ مالىمەتىندە.
بۇدان بۇرىن حابارلانعانداي، جەتىسۋ وبلىسىنداعى ءۇشارال اۋەجايىندا ۇشىپ- قونۋ جولاعى كەڭەيتىلىپ، قايتا جاڭعىرتىلىپ جاتىر. الاكول اۋەجايى شىلدەدە ىسكە قوسىلىپ، كۇنىنە 500 جولاۋشى قابىلدايدى. سونىمەن قاتار، الماتىدان الاكولگە قاتىنايتىن تالگو پويىزدارىنا بيلەت ساتىلا باستادى.
