ارتسپورت باعدارلاماسى جابىلادى دەۋگە ەش نەگىز جوق - داۋرەن ابايەۆ
«ءبىز ەشقاشان جاۋاپكەرشىلىكتەن قاشپايمىز. باعدارلاما جابىلادى دەۋگە دە ەش نەگىز جوق. وسى ۋاقىتقا دەيىن ماقۇلدانعان ۆاۋچەرلەر تولەنەتىنىن اتاپ وتكىم كەلەدى. ءار ايماق وعان قاجەتتى قارجىنى قاراستىرىپ جاتىر. مىسالى، الماتى قالاسىنىڭ اكىمدىگى وسى ماقساتقا 4 ميلليارد تەڭگەدەن استام قاراجات ءبولدى»، - دەدى داۋرەن ابايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
دەگەنمەن مينيستر قوعامنىڭ جۇيە جۇمىسىنداعى ولقىلىقتارعا نارازىلىعى نەگىزسىز دەپ ايتا المايتىنىن باسا ايتتى.
«ءبىز مالىمەتتەردى تەكسەرۋ، كەزەكتى اۆتوماتتاندىرۋ، قارجىنى ءبولۋ مەن قىزمەت ۇسىنۋشىلاردىڭ ەسەبىن قاداعالاۋعا بايلانىستى ءبىرقاتار كەمشىلىكتىڭ كەتكەنىن مويىنداۋىمىز كەرەك. وسى ماسەلەلەردى شەشۋ ءۇشىن باسقا دا مۇددەلى مەملەكەتتىك ورگاندار ەرەجەگە بىرنەشە وزگەرىس ەنگىزىپ وتىر. بۇل پروتسەسس ەكى كەزەڭنەن تۇرادى. العاشقى كەزەڭ بيىل مامىردا جۇزەگە اسىرىلدى. جاڭا نورمالارعا سايكەس، وقىتۋشىلار مەن جاتتىقتىرۋشىلاردىڭ ساناتىنا قويىلاتىن تالاپ كۇشەيتىلدى، اكىمشىلىكتەردىڭ وتىنىشتەردى قاراۋ مەرزىمى ۇزارتىلدى، ساپانى باقىلاۋعا جانە قارجىنىڭ ماقساتتى يگەرىلۋىنە ەلەكتروندى جانە جالپىعا قولجەتىمدى فورماتتا مونيتورينگ جۇرگىزۋ جۇيەسى ەنگىزىلدى. ەندى ءبىز ەكىنشى كەزەڭدە جۇيەگە تاعى بىرنەشە وزگەرىس ەنگىزەمىز»، - دەدى ول.
«سپورت تۇرلەرىنىڭ سانى 71 دەن 30-عا دەيىن، شىعارماشىلىق ۇيىرمەلەر 59-دان 30-عا دەيىن قىسقارادى. قىسقاشا ءتۇسىندىرىپ وتەيىن. الدىمەن ءبىز قايتالاناتىن سپورت تۇرلەرىن توپتاستىردىق. مىسالى، قازىر وندا ۇستەل تەننيسى، كوزى ناشار كورەتىن بالالارعا ارنالعان ۇستەل تەننيسى، تىرەك- قيمىل جۇيەسى زاقىمدانعان بالالارعا ارنالعان ۇستەل تەننيسى جانە بەيىمدەلگەن تەننيس تۇرلەرى بار. بۇل سەكسيالاردىڭ بارلىعى ءوز جۇمىسىن جالعاستىرا بەرەدى. تەك ءبىر ورتاق اتاۋعا بىرىكتىرىلەدى»، - دەدى داۋرەن ابايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، جەڭىل اتلەتيكاداعى جاعداي دا وسىعان ۇقساس. «ءبىراق ءبىز تولىق الىپ تاستايتىن سپورت تۇرلەرى دە بار. ونى وزدەرىڭىزگە كەيىن حابارلايمىز»، - دەدى مينيستر.
اۆتور: مارلان جيەمباي
