قاراعاندى مەن بالقاش اراسىنداعى جىر بولعان اۆتوباننىڭ ەكى جولاعى اشىلادى
ال قالعان بولىگى جىل سوڭىنا دەيىن تاپسىرىلماق.
الايدا 2019 -جىلى باستالعان قۇرىلىستىڭ ءالى كۇنگە تەك % 50 اياقتالعان. قاراعاندى مەن بالقاشتىڭ اراسىنداعى اۆتوباننىڭ قۇرىلىسى قايتا جانداندى. بۇل ۋچاسكەدە سوڭعى التى اي بويى جۇمىس توقتاپ تۇرعان. مىندەتىن دۇرىس اتقارماعان مەردىگەر شەتتەتىلىپ، قازىر ونىڭ ورنىنا باسقا كومپانيا كەلدى. ولار العاشقى اپتانىڭ وزىندە 12 شاقىرىم اسفالت توسەپ ۇلگەرگەن. وسىلايشا، جۇمىسقا كىرىسكەن تۇرىك كومپانياسى جىر بولعان 363 شاقىرىم جولدى جىل سوڭىنا دەيىن اياقتاۋعا بەكىنىپ وتىر. قازىر ولار قولدارىنداعى بارلىق تەحنيكا مەن ادام كۇشىن وسى ارالىقتاعى ءتورت ۋچاسكەگە جۇمىلدىرعان.
بەرىك جايساڭبايەۆ، جوبا جەتەكشىسى:
- ءوزىمىزدىڭ رەسۋرستارمەن، فيرمانىڭ كۇشىمەن سالىپ جاتىرمىز. ءالى قارجىلاندىرىلعان جوق. ءبىراق وسى 1-2 كۇندە شەشىلەدى دەگەن اقپارات بار. 15- شىلدەگە دەيىن ءبىر جولاعىن اشۋدى جوسپارلاپ وتىرمىز. قۇرىلىس ماۋسىمىنىڭ سوڭىنا دەيىن ەكى جولاقتى ەكى باعىتتا بەرەمىز. جوبانىڭ ءاۋ باستاعى قۇنى - 248 ميلليارد تەڭگە. الايدا سوڭعى 3-4 جىلدا قۇرىلىس ماتەريالدارىنىڭ قۇنى % 30 وسكەن. سوعان وراي، قۇجاتقا تۇزەتۋلەر ەنگىزىلىپ، قوسىمشا قاراجات بولىنەتىن بولدى. ال بۇعان دەيىن جۇمىسىنا جاۋاپسىز قاراعان مەردىگەر جازاعا تارتىلادى.
مارات ءتۇسىپوۆ، قاراعاندى وبلىستىق قوعامدىق كەڭەستىڭ مۇشەسى:
- مەردىگەر جىبەرگەن كەمشىلىكتەرىنىڭ كەسىرىنەن وسىلاي بولعان. ولارعا 50 ميلليوننان استام ايىپپۇل، جازا تولەۋ مىندەتتەلگەن ەكەن. ونى سوڭىنا دەيىن قاداعالاۋ كەرەك. ەكىنشىسى، قوسالقى مەردىگەرلەردەن قاراجات العان كەزدە 56 كۇنگە دەيىن سوزىلىپ كەتەدى ەكەن. بۇل دا قيىندىق تۋدىرادى. وسى سۇراقتاردى كوتەردىك. بۇدان بىلاي جۇمىس بارىسىن وبلىستىق قوعامدىق كەڭەس مۇشەلەرى باقىلايتىن بولادى. ال ساپاسىن «جول ساپا» ماماندارى تەكسەرەدى. جوبا 2023 -جىلدىڭ قىركۇيەك ايىندا تۇگەل اياقتالۋى ءتيىس.
www.khabar.kz
