قىزىلوردادا تاعى ءبىر ءىرى ەسىرتكى القابى جويىلدى

قىزىلوردا. قازاقپارات - قىزىلوردالىق پوليسەيلەر تاعى دا ءىرى ەسىرتكى القابىن جويدى، دەپ حابارلايدى قازاقپارات ءتىلشىسى.

بۇل ماقساتتا قىزىلوردا وبلىسى پوليتسيا دەپارتامەنتى ەسىرتكى قىلمىسىنا قارسى ءىس- قيمىل باسقارماسى، ق ر ۇلتتىق قاۋىپسىزدىك كوميتەتى قىزىلوردا وبلىسى جانە بايقوڭىر دەپارتامەنتى بىرلەسىپ جەدەل ءىس- شارا جۇرگىزدى. ناتيجەسىندە قىزىلوردا قالاسىنىڭ 34 جاستاعى قالا تۇرعىنىنىڭ شيەلى اۋدانىنا قاراستى دالالىق جەردەگى قالىڭ سەكسەۋىل اراسىندا 1665 ءتۇپ سورا وسىمدىگىن ەككەنى انىقتالدى.

«كۇدىكتى شيەلى اۋداندىق پوليسيا ءبولىمىنىڭ ۋاقىتشا ۇستاۋ يزولياتورىنا وقشاۋلاندىرىلدى. اتالعان دەرەك بويىنشا ق ر قىلمىستىق كودەكسىنىڭ 296-بابىنىڭ 3-بولىگىمەن جانە 300- بابىنىڭ 2-بولىگىمەن سوتقا دەيىنگى تەرگەپ- تەكسەرۋ ارەكەتتەرى جۇرگىزىلۋدە»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.

ەسكە سالساق، بۇدان بۇرىن قىزىلوردا وبلىسىندا قالىڭ شەڭگەل اراسىنان ءىرى ەسىرتكى القابى انىقتالدى.