ەلوردادا مەكتەپتەرگە، كوشەلەر مەن اللەيالارعا تاريحي تۇلعالاردىڭ ەسىمدەرى بەرىلىپ جاتىر
نۇر- سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپتىڭ مالىمەتىنشە، قازىرگى تاڭدا 30 كوشەگە، 3 اللەياعا، 6 مەكتەپكە بەلگىلى تۇلعالاردىڭ ەسىمدەرىن، 7 كوشەگە جەر- سۋ اتاۋلارى بەرۋ جۇمىستارى ۇيىمداستىرىلۋدا. اتاپ ايتساق، قالا مەكتەپتەرىنە كەڭەس وداعىنىڭ باتىرى، اۆياتسيا گەنەرال- مايورى تالعات بيگەلدينوۆ، كورنەكتى مەملەكەت جانە قوعام قايراتكەرى تەمىربەك جۇرگەنوۆ، الاش قوزعالىسىنىڭ بەلدى مۇشەسى، قازاق پوەزياسىنىڭ كورنەكتى وكىلى ماعجان جۇمابايەۆ، قازاقستاننىڭ حالىق جازۋشىسى، بەلگىلى اقىن قادىر مىرزا ءالى، قازاقتىڭ ايگىلى كۇيشى- كومپوزيتورى، دومبىراشى تاتتىمبەتتىڭ ەسىمدەرى بەرىلەتىن بولادى.
سونىمەن قاتار قۇرامداس بولىكتەرگە كورنەكتى مەملەكەت قايراتكەرى ورال مۇحامەدجانوۆ، مەملەكەت قايراتكەرى نۇرلان بالعىمبايەۆ، قازاقستاننىڭ حالىق جازۋشىسى، دراماتۋرگ سافۋان شايمەردەنوۆ، كەڭەس وداعىنىڭ باتىرى نۇركەن ءابدىروۆ، قازاقستاننىڭ حالىق جازۋشىسى، مەملەكەت جانە قوعام قايراتكەرى شەرحان مۇرتازا، كومپوزيتور، سيمفونيالىق كۇي جانرىنىڭ نەگىزىن قالاۋشى ەركەعالي راحماديەۆ، جازۋشى حامزا ەسەنجانوۆ، قازاقستاننىڭ حالىق ءارتىسى قۇمان تاستانبەكوۆ، جازۋشى، ادەبيەت زەرتتەۋشىسى اقسەلەۋ سەيدىمبەك، قوعام قايراتكەرى، اعارتۋشى، شىعىستانۋشى، قازاقتىڭ العاشقى كونستيتۋتسياسىنىڭ اۆتورى بارلىبەك سىرتتان ۇلى، ادەبيەتشى، سىنشى تۇرسىنبەك كاكىشيەۆ جانە ت. ب. تۇلعالاردىڭ ەسىمدەرىن بەرۋ تۋرالى جۇمىستار جۇرگىزىلىپ جاتىر.
بۇدان باسقا ابىلاي حان داڭعىلىندا، دينا نۇرپەيىسوۆا ەسكەرتكىشىنىڭ جانىندا ورنالاسقان اتاۋسىز اللەياعا «قازاق ەلىنىڭ كۇيشىلەرى مەن كۇيشى- كومپوزيتورلارىنىڭ اللەياسى» اتاۋى، قازاقستان رەسپۋبليكاسى سىرتقى ىستەر مينيسترلىگى عيماراتىنىڭ الدىندا ورنالاسقان اتاۋسىز اللەياعا مەملەكەت جانە قوعام قايراتكەرى، پۋبليتسيست، ديپلومات - ءنازىر تورەقۇلوۆتىڭ ەسىمى بەرىلەتىن بولادى. ايتا كەتۋ كەرەك، قازىرگى ۋاقىتتا نۇر- سۇلتان قالاسىندا اتاۋ بەرىلگەن قۇرامداس بولىكتەردىڭ جالپى سانى – 1119، ونىڭ ىشىندە داڭعىل – 17، كوشە – 789، قىسقا كوشە – 309، تاسجول - 4. 1997 -جىلدان بەرى بۇگىنگى كۇنگە دەيىن ەلوردامىزدىڭ مورالدىق تۇرعىدان ەسكىرگەن 412 كوشەسى قايتا اتالىپ، 456 جاڭادان پايدا بولعان قۇرامداس بولىكتەر اتاۋلارعا يە بولدى.
