مۇعالىمدەردى مامان تاپشى وڭىرلەرگە تارتۋعا ارنالعان جاڭا باعدارلاما باستالدى

بۇل تۋرالى ق ر وقۋ- اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا ءمالىم ەتتى، دەپ حابارلايدى قازاقپارات ءتىلشىسى.

ق ر وقۋ- اعارتۋ مينيسترلىگىنىڭ مالىمەتىنە سايكەس، مۇعالىمدەر تاپشىلىعى جانە ءبىلىم ساپاسى ناشار وڭىرلەر ماسەلەسى تۇركىستان، اتىراۋ، ماڭعىستاۋ جانە الماتى وبلىسىنا قاتىستى بولىپ وتىر. اتالعان ايماقتاردا ماتەماتيكا، فيزيكا، حيميا، ورىس ءتىلى مەن ادەبيەتى جانە شەتەل ءتىلى مۇعالىمدەرى جەتىسپەيدى. ماسەلەنى شەشۋ ءۇشىن مينيسترلىك پەداگوگتەرگە ارنالعان ارنايى بايقاۋ جاريالاپ وتىر. قاجەتتى قۇجاتتار ءتىزىمى وڭىرلىك ءبىلىم باسقارمالارى جانە ن ز م- ءنىڭ (نازاربايەۆ زياتكەرلىك مەكتەبى) اقپارات رەسۋرستارىندا ورنالاستىرىلعان. قۇجات قابىلداۋ 2022 -جىلعى 26 -ماۋسىمعا دەيىن جۇرەدى.

«مۇعالىمدەر وسى باعدارلاماعا قاتىسىپ ءوز باعىن سىناي الادى. باعدارلاماعا تاجىريبەلى ۇستازدارمەن قاتار وقۋدى ەندى بىتىرگەن جاس ماماندار دا ءوتىنىم بەرە الادى. جوعارىدا اتالعان 4 وڭىردە ۇيلەستىرۋ كەڭەسى قۇرىلدى. باعدارلاماعا قاتىسۋشى ۇستازدار الدىمەن ءوز ءپانى بويىنشا تەست تاپسىرادى. ەكىنشى كەزەڭگە وتكەندەر 350 سوزدەن تۇراتىن ەسسە جازۋى كەرەك. ەكى كەزەڭنەن ءساتتى وتكەن ءمۇعالىم سوڭعى اڭگىمەلەسۋدەن وتەدى. اڭگىمەلەسۋ ZOOM پلاتفورماسى ارقىلى سۇراق- جاۋاپ تۇرىندە ۇيىمداستىرىلادى»، - دەدى گۇلميرا كارىموۆا مينيسترلىكتىڭ «Oqu-ağartu LIVe « جوباسىنىڭ تىكەلەي ەفيرىندە.

ونىڭ ايتۋىنشا، باعدارلاماعا قاتىسۋشى ءمۇعالىم بارلىق تاپسىرمانىڭ 60 پايىزىن ءساتتى ورىنداعان جاعدايدا جولداما الادى. سونداي- اق، ۇستازدار سىناقتى وڭىرلەردەگى نازاربايەۆ زياتكەرلىك مەكتەبىندە تاپسىرادى.

اۆتور: ءالي يبرايەۆ