شەگىرتكەمەن كۇرەس شارالارىن مەملەكەت ءوز مونوپولياسىنا الۋى مۇمكىن

نۇر- سۇلتان. قازاقپارات - شەگىرتكەمەن كۇرەس شارالارى قايتادان تۇتاستاي مەملەكەتتىڭ قۇزىرىنا بەرىلۋى مۇمكىن، دەپ حابارلايدى قازاقپارات ءتىلشىسى.

ق ر اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ ءتوراعاسى المابەك مارس ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت بەردى.

«كەلەشەكتە شەگىرتكەمەن كۇرەس شارالارىنا مەملەكەتتىك مونوپوليا ەنگىزۋدى جوسپارلاپ وتىرمىز. سونداي- اق، مەملەكەت ەسەبىنەن كۇرەس جۇرگىزىلەتىن زيانكەستەردىڭ ءتىزىمى قايتا قارالۋى مۇمكىن. مىسالى، 2020 جىلعا دەيىن شالعىن كوبەلەگى وسى تىزىمدە بولدى دا، وعان قارسى ءدارى جەرگىلىكتى بيۋدجەتتەردىڭ ەسەبىنەن سەبىلىپ كەلدى. 2020 -جىلى شالعىن كوبەلەگىنە قارسى دارىلەۋ جۇمىستارىن سۋبسيديالاۋ تۋرالى نورما شىقتى. ەكى جىل ءوتىپ ۇلگەرمەي جاتىپ اۋىل شارۋاشىلىعى تاۋارىن وندىرۋشىلەر مەن «اتامەكەن» ۇ ك پ بۇرىنعى جۇيەنى قايتارۋدى سۇراپ جاتىر»، - دەدى ينسپەكتسيا باسشىسى.

سونداي- اق، ول قىرىققابات كوبەلەگىنەن كەلەتىن قاۋىپتىڭ كوبەيۋى مۇمكىن ەكەنىن اتاپ ءوتتى.

«وسىعان بايلانىستى ونى دا بيۋدجەت ەسەبىنەن كۇرەس جۇرگىزىلەتىن زيانكەستەر قاتارىنا ەنگىزۋ جوسپاردا بار. قازاقستانعا جىل سايىن سىرتتان 25 مىڭ توننا پەستيتسيد اكەلىنەدى. سول پەستيتسيدتەردى قولدانۋ ەرەجەسىن وزگەرتۋ ۇسىنىلىپ وتىر. پەستيتسيد قۇيىلعان ءاربىر كانيستراعا QR- كود ورناتىلۋى مۇمكىن. سوندا ولاردىڭ جىلجۋ باعىتتارىن باقىلاپ وتىرۋعا بولادى. بۇل پەستيتسيد ساپاسىنىڭ ساقتالۋىن جانە بوساعان ىدىستىڭ ەكولوگيالىق زيان كەلتىرمەۋىن قامتاماسىز ەتەدى. سونداي- اق، فيتوسانيتاريالىق ەسەپتەردى سيفرلاندىرۋ قولعا الىنباقشى»، - دەدى المابەك مارس.

ونىڭ ايتۋىنشا، بيىل شەگىرتكەگە قارسى كۇرەسكە 2,5 ميلليارد تەڭگە جۇمسالادى .