جىلىنا ميلليوننان اسا ادام زورلىق-زومبىلىقتان كوز جۇمادى

نۇر-سۇلتان. قازاقپارات - الەمدەگى ءاربىر ءۇشىنشى ايەل دەنە نەمەسە جىنىستىق زورلىق- زومبىلىققا ۇشىرايدى.

جىل سايىن 2- 17 جاستاعى ءاربىر ەكىنشى بالا ءارتۇرلى زورلىققا تاپ بولىپ جاتىر.

20 جاسقا دەيىنگى 120 ميلليون قىز ەرىكسىز جىنىستىق قاتىناسقا ءتۇسىپ كەلەدى. بۇل تۋرالى ب ۇ ۇ ادام قۇقىقتارى جونىندەگى كەڭەسىندە تاۋەلسىز ساراپشىسى تلالەنگ موفوكەنگتىڭ بايانداماسىندا ايتىلدى، دەپ حابارلايدى قازاقپارات ب ۇ ۇ جاڭالىقتارى سايتىنا سىلتەمە جاساپ.

تلالەنگ موفوكەنگتىڭ سوزىنە قاراعاندا، زورلىق-زومبىلىق ءار ءتۇرلى فورمادا كورىنەدى: مىسالى، پاندەميا كەزىندە ادامداردى وقشاۋلاۋ ناتيجەسىندە كۇشەيگەن ايەلدەرگە قاتىستى زورلىق- زومبىلىق ءالى دە كەڭ تارالعان. زورلىق- زومبىلىق پەن قاتىگەزدىك كوپتەگەن دەموكراتيالىق ەلدەردە دە، ديكتاتورلىق رەجيمى بار ەلدەردە دە پوليتسيانىڭ ءىس- ارەكەتىندە قالىپتى جاعدايعا اينالدى. زورلىق- زومبىلىققا بالالار، قارتتار مەن مۇگەدەكتەر ۇشىراپ جاتىر. ساراپشى زورلىق- زومبىلىق ديسكريميناتسيانىڭ باسقا تۇرلەرى بىتپەگەندىكتەن بولىپ جاتىر دەپ سانايدى.

«پاتريارحالدى، ءناسىلشىل، كاپيتاليستىك، گوموفوبيالىق، ترانسفوبيالىق جانە ەيبليستىك (مۇمكىندىگى شەكتەۋلى ادامدارعا قارسى باعىتتالعان) قىسىم تۇرلەرى زورلىق- زومبىلىققا اكەپ سوقتىرادى»، - دەدى بايانداماشى.

جىل سايىن الەمدە زورلىق- زومبىلىققا بايلانىستى جاراقاتتان 1,25 ميلليون ادام قايتىس بولادى. كوپتەگەن زورلىق- زومبىلىق قۇرباندارى ءومىر بويى مۇگەدەك بولىپ قالادى نەمەسە سوزىلمالى جانە پسيحيكالىق اۋرۋعا ۇشىرايدى. د د ۇ مالىمەتى بويىنشا، بالالارعا قاتىستى زورلىق- زومبىلىق ولىمگە، اۋىر جاراقاتقا اكەلۋى، مي مەن جۇيكە جۇيەسىنىڭ، كوگنيتيۆتى دامۋىنا تەرىس اسەر ەتۋى مۇمكىن. زورلىق- زومبىلىققا ۇشىراعان بالالار ءجيى تەمەكى شەگىپ، الكوگول مەن ەسىرتكى پايدالانادى.

اۆتور: اقبوپە ءابدراسۋل