جىلدام ويلانۋعا كومەكتەسەتىن ادىستەر

نۇر-سۇلتان. قازاقپارات - جىلدام شەشىم قابىلداۋ، قالجىڭعا ۇيلەسىمدى جاۋاپ بەرۋ، توتەنشە جاعدايدا تەز ارەكەت ەتۋ - بۇلاردىڭ ءبارى ميىڭىزدىڭ جۇمىس ىستەۋ جىلدامدىعىنا بايلانىستى.

وعان ادەتتەردەن باستاپ دەنساۋلىق جاعدايىنا دەيىن كوپتەگەن فاكتورلار اسەر ەتەدى. ەندەشە، زەرەك بولۋعا كومەكتەسەتىن كەڭەستەردى ۇسىنامىز.

ۇيقىنى قاندىرىڭىز

ۇيقى دەنەمىزدىڭ ءار جۇيەسىنە اسەر ەتەدى: جۇرەك، وكپە، مي جانە ت. ب. سوندىقتان جىلدام ويلانۋ ءۇشىن جاقسى ۇيىقتاۋ كەرەك. كۇندە، ءتىپتى، دەمالىس كۇندەرى دە ءبىر ۋاقىتتا جاتىپ، ءبىر ۋاقىتتا تۇرۋدى ادەتكە اينالدىرىڭىز. ۇيىقتار الدىندا بوساڭسۋ ءۇشىن ورىندايتىن پايدالى ادەت ويلاپ تابىڭىز. ول شوپتەردەن دايىندالعان شاي ءىشۋ، ۆاننا قابىلداۋ نەمەسە مەديتاتسيا جاساۋ بولۋى مۇمكىن. سونداي- اق، سالقىنداۋ جانە قاراڭعى بولمەدە ۇيىقتاڭىز.

ءبىر ۋاقىتتا كوپ تاپسىرما ورىنداۋدان باس تارتىڭىز

ءبىر ۋاقىتتا كوپ تاپسىرما ورىنداۋ قابىلەتى جايلى قانشا جاقسى نارسەلەر ايتىلسا دا، ونىڭ ادامدى شارشاتاتىنى راس. ءبىر ىستەن ەكىنشىسىنە، ودان باسقاسىنا كوشىپ ءجۇرىپ، زەيىن قويۋدى ساقتاۋ قيىن. مي باياۋ جۇمىس ىستەي باستايدى، ال ول قويىلعان مىندەتتەردى ورىنداۋ تيىمدىلىگىنە جاعىمسىز اسەر ەتەدى. ەگەر ول، كەرىسىنشە، جىلدام جۇمىس جاساعانىن قالاساڭىز، ءبىرىنشى ءبىر ءىستى اياقتاپ، سودان سوڭ كەلەسىسىنە كىرىسۋدى ادەتكە اينالدىرىڭىز.

باستى قاتىراتىن ويىندار ويناڭىز

باس قاتىرعىش ويىندار ارقىلى ميدى دامىتۋ قىزىق جانە پايدالى. اسىرەسە، ۇزاق جولدا ءوزىڭىزدى نەمەن الاڭداتاتىنىڭىزدى بىلمەسەڭىز، وسىنداي پايدالى ىسپەن اينالىسىڭىز. مۇنداي ويىننىڭ وزىڭىزگە ۇنايتىن كەز كەلگەن ءتۇرىن تاڭداڭىز: ءسوزجۇمباق، سۋدوكۋ، رۋبيك كۋبيگى. نەمەسە ۇيالى تەلەفونىڭىزعا قىزىقتى زياتكەرلىك ويىندار جۇكتەپ الىڭىز. قانداي دا ءبىر دەڭگەيدەن ءوتۋ ءۇشىن ارنايى ۋاقىت بولىنگەن تۇرلەرىنە اسا ءمان بەرىڭىز. ۋاقىت وتە باس قاتىرعىشتاردى ءجيى شەشكەن سايىن ولاردان جىلدام وتەتىنىڭىزدى بايقايسىز.

مۋزىكالىق اسپاپتا ويناۋدى ۇيرەنىڭىز

مۋزىكا ميدىڭ دامۋىنا ىقپال ەتەدى جانە جىلدام ويلانۋعا كومەكتەسە الادى. سۇيىكتى تۋىندىلارىڭىزدى تىڭداۋ عانا ەمەس، سونداي- اق مۋزىكالىق اسپاپتا ويناۋدى ۇيرەنۋ دە پايدالى. ارينە، گيتارا نەمەسە بارابان ساتىپ الۋ جانە كۋرسقا قاتىسۋ شىعىندى تالاپ ەتەدى. ءبىراق قالاساڭىز، كەز كەلگەن نارسەنىڭ قولجەتىمدى بالاماسىن تابۋعا بولادى. مىسالى، ارزانداۋ باعاعا ۋكۋلەلە ساتىپ الىپ، ونى Youtube جەلىسىنەن ۇيرەنۋگە بولادى.

كۇندەلىك نەمەسە جۋرنال جازىڭىز

كۇندەلىك نەمەسە قىسقا ەسكەرتپەلەر جازىپ ءجۇرۋ مي جۇمىسىن جىلدامداتۋعا جانە ماڭىزدى ەشتەڭە ۇمىتپاۋعا كومەكتەسەدى. ەگەر جازۋدى كۇندەلىكتى ادەتكە اينالدىرساڭىز، انىق ويلاپ، ويىڭىزدى جاقسى جەتكىزەتىن بولاسىز. وعان قوسا، جازۋ ارقىلى جاعىمسىز سەزىمدەرىڭىزدەن ارىلا الاسىز.

ويلاۋ جىلدامدىعىن ۇساق- تۇيەكپەن جاتتىقتىرىڭىز

ويلاۋ جىلدامدىعىن جاتتىقتىرۋدى كۇندەلىكتى ادەتكە اينالدىرۋ ءۇشىن ۇساق- تۇيەكتەرگە دەيىن ءمان بەرۋ كەرەك. مىسالى، كافەگە بارىپ تاماققا تاپسىرىس بەرۋ كەزىندە ءمازىردى ۇزاق ۋاقىت قاراۋدىڭ ورنىنا وزىڭىزگە ءۇش مينۋتتىك تايمينگ جاريالاڭىز. سول سەكىلدى سىرتقا سەرۋەندەۋگە نەمەسە جۇمىسقا شىعاردا كيىم تاڭداۋ كەزىندە ناقتى ۋاقىت قويىپ تاستاڭىز. مۇنداي جاتتىعۋلاردى ءجيى قولدانساڭىز، كوپ ۇزاماي ويلانۋ جىلدامدىعى باسقا دا بەلسەندىلىكتەردە وزگەرگەنىن بايقايسىز.

شىعارماشىلىقپەن اينالىسىڭىز

شىعارماشىلىق تا باس قاتىرعىشتار سەكىلدى ميعا جاعىمدى اسەر ەتەدى. شىعارماشىل جۇمىستارعا قانشالىقتى كوپ ۋاقىت جۇمساساڭىز، تاپسىرمالاردى سونشالىقتى جىلدام ويلاۋدى جانە شەشۋدى ۇيرەنەسىز. مىسالى، نومەرلەر بويىنشا سۋرەت بوياۋ، جاڭا رەتسەپتىلەردى جاساپ كورۋ، ولەڭ ايتۋ جانە سپورتتىڭ جاڭا تۇرلەرىن مەڭگەرۋ پايدالى. ەگەر مي جۇمىسىن جىلدامداتقىڭىز كەلسە، جاڭا جانە قىزىقتى بىردەڭەمەن اينالىسۋعا ۋاقىت ءبولىڭىز.

دۇرىس تاماقتانىڭىز

ناقتى دارۋمەندەر مەن قورەكتىك زاتتار مي جۇمىسىن جاقسارتادى. مىرىش پەن يود ەستە ساقتاۋدى جاقسارتادى، ال B6, B12 دارۋمەندەرى جانە فوليي قىشقىلى شارشاۋدىڭ الدىن الادى. ومەگا-3 ميدىڭ دۇرىس جانە جىلدام قىزمەت ەتۋىنە كومەكتەسەدى.

massaget.kz