دۇنيە جۇزىندە قانت تاپشىلىعى تۋىندادى
دۇنيەجۇزىن قانتپەن قامتيتىن مەملەكەتتەرگە گەوساياسي قالاي اسەر ەتىپ جاتىر؟ جالپى جاھاندىق شەكەر ەكسپورتىنىڭ بيىلعى جاي- كۇيى قالاي؟ شەكەردى سىرتقا ساتۋدان الەم ەلدەرىنىڭ ىشىندە برازيليا كوش باستاپ تۇر. 2020 -جىلعى دەرەك بويىنشا برازيليا جاھاننىڭ ۇشتەن ءبىر بولىگىن قانت قۇراعىمەن قامتىعان ەكەن. بيىل ونىمدىلىك جوعارى بولادى دەپ كۇتىلگەنىمەن، لاتىنامەريكا ەلى ەكسپورت كولەمىن قىسقارتپاق. بۇعان ناۋرىزدا ەتانول يمپورتىنا شەكتەۋ ەنگىزىلگەنى سەبەپ. ال برازيلياداعى ەتانول وندىرىسىنە ءدال وسى قانت قۇراعى قولدانىلادى. ەتانولعا دەگەن سۇرانىستىڭ سەبەبىن Ethanol production باسپاسىنا بەرگەن سۇحباتتا ساراپشى دجاستين كيرححوفف بىلاي دەپ كەلتىرەدى.
دجاستين كيرححوف، AGRICULTURAL GROUP ينۆەستورلارى ءسامميتىنىڭ پرەزيدەنتى:
برازيلياداعى جانار- جاعار ماي ستانساسىنا كەلسەڭىز، سۇيىق وتىننىڭ ءۇش ءتۇرىن كەزدەستىرەسىز. ونىڭ ءبىرى ديزەل وتىنى، ەكىنشىسى %27 ەتانول قوسپاسى بار بەنزين، ال ءۇشىنشىسى %100 ەتانول. مۇنداعى جۇرگىزۋشىلەر كوبىنە 100 پروتسەنتتىك ەتانول نەمەسە 27 پروتسەنتتىك ەتانولى بار وتىندى كولىكتەرىنە قۇيىپ جاتادى. قانت وندىرۋدەن ءبىرىنشى ورىنداعى ءۇندىستان دا ماۋسىمنىڭ 1 ىنەن قىركۇيەكتىڭ سوڭىنا دەيىن قانت ەكسپورتىنا شەكتەۋ سالدى. جاھانداعى ۇلەسى 10 پروتسەنتتى قۇرايتىن ءۇندى ەلى ىشكى نارىعىن قورعاۋ ءۇشىن وسىنداي امالعا بارعان. ەندى ءۇندىستاندىق قانتتى الدىرۋ ءۇشىن جاھان ەلدەرىنىڭ ارنايى سۇراۋ جىبەرۋىنە تۋرا كەلەدى. ونىڭ وزىندە قاجەت مولشەردەگى شەكەرگە قول جەتكىزۋى ەكىتالاي. جالپى، شەكەر تاپشىلىعى بيىل عانا تۋىنداعان ماسەلە ەمەس.
شتەفان شترەنگ، وڭتۇستىك گەرمانيانىڭ قانت قىزىلشاسى وندىرۋشىلەرى قاۋىمداستىعىنىڭ باسشىسى:
- سوڭعى ءۇش جىلدا قانتقا دەگەن سۇرانىس ونىڭ وندىرىسىنەن اسىپ كەتكەن. ءبىر سوزبەن ايتقاندا، الەمدەگى قانت قورى جەتپەيتىن جاعدايعا جەتتىك. سوندىقتان ءبىر مەملەكەتتە قانت قىزىلشاسى نەمەسە قۇراعىنىڭ ءوسىمى تومەندەسە، قانتپەن قامتۋ قيىنداپ، سالدارىنان تۇتاس جاھان زارداپ شەگەدى. ويتكەنى كەز كەلگەن تاعام تۇرىندە قايتا وڭدەلگەن قانت قولدانىلادى. وسى سەبەپتى شەكەردىڭ جەتىسپەۋشىلىگى كونديتەرلەرگە عانا ەمەس، تۇتاس ازىق- تۇلىك وندىرىسىنە كەسىرىن تيگىزىپ تۇر. بۇل دۇنيە ءجۇزى ەلدەرىنە ورتاق پروبلەما. ۋكراينا مەن رەسەي اراسىنداعى سوعىس جاعدايدى ودان سايىن ۋشىقتىرىپ وتىر.
www.24.kz
