دەپۋتات ۇلتتىق قور تۋرالى: ءبىز بولاشاقتىڭ نەسىبەسىنە قول سالىپ جاتىرمىز

نۇر- سۇلتان. قازاقپارات - ءماجىلىس دەپۋتاتى بەرىك دۇيسەنبينوۆ پارلامەنتتىڭ بىرلەسكەن وتىرىسىندا «اقجولدىقتاردىڭ» ۇكىمەت پەن ەسەپ كوميتەتىنىڭ بيۋدجەت تۋرالى ەسەبىن بەكىتۋدەن نەگە باس تارتقانىن ءتۇسىندىردى دەپ حابارلايدى قازاقپارات ءتىلشىسى.

«بۇگىنگى بيۋدجەتتىڭ ورىندالۋى تۋرالى باياندامالاردى بايقاساڭىز، كوبى سىنعا تولى بولدى. ءبىراق ءبىز نەگە قالىس قالىپ، قالعاندارى نەگە قولداعانى وزگە پارتيالارىڭ ءوز جۇمىستارى شىعار. ءبىزدىڭ ۇستانىم ايقىن. ۇلتتىق قور ءبىر جىلدا 55 ميلليارد دوللارعا كەمىسە، قالاي ونى قولداۋعا بولادى؟ ۇلتتىق قور دەگەن بولاشاقتىڭ نەسىبەسى عوي. ءبىز بولاشاقتىڭ نەسىبەسىنە قول سالىپ جاتىرمىز. سوندىقتان بيۋدجەتتىڭ بۇلاي ورىندالۋىن ءبىز قولداي المايمىز»، - دەدى ءماجىلىس وكىلى.

دەپۋتات ەلدەگى جەكەشەلەندىرۋ ساياساتى مەن ينۆەستيتسيالىق جوبالاردىڭ ءبىر- بىرىنە قايشى كەلىپ جاتقانىن اتادى.

«ءبىر قولىمىزبەن پالەن ميللياردقا مەديتسينالىق وبەكتىلەر سالىپ، ەكىنشى قولىمىزبەن ءدال سونداي نىسانداردى ءوز باعاسىنان ارزانعا ساتىپ جاتىرمىز. ونى قالاي قولداۋعا بولادى؟ ەكونوميكالىق ايماقتار دەپ وتىرمىز. ول ايماقتار تابىس اكەلىپ، جۇمىس ورىندارىن اشادى، ەلىمىزگە كول- كوسىر پايدا اكەلەدى دەدىك. ولاردىڭ قازىر ەكونوميكاداعى الاتىن ءرولى 0,1 پايىز عانا. قانشاما قارجى قۇيىلدى؟ ! جەكە تاراپتاردان، جەكە ازاماتتاردان ينۆەستيتسيا تارتىلعان جوق. بۇكىل كۆازيمەملەكەتتىك سەكتور سالىپ وتىر. مۇنداي كوزباياۋشىلىقپەن ەكونوميكالىق ايماق قۇرۋ نە ءۇشىن كەرەك؟» ، - دەدى بەرىك دۇيسەنبينوۆ.

ايتا كەتەيىك، بۇگىن پارلامەنت ۇكىمەت پەن ەسەپ كوميتەتىنىڭ بيۋدجەت تۋرالى ەسەبىن بەكىتتى.

اۆتور: ەسىمجان ناقتىباي