اتىراۋ ستاديونىندا فۋتبول جانكۇيەرلەرى توبەلەسىپ قالدى
اتىراۋ. قازاقپارات - بۇگىن اتىراۋدا ەل بىرىنشىلىگىنىڭ ⅩⅣ تۋرى اياسىندا «اتىراۋ» مەن «اقتوبە» فۋتبول كوماندالارى كەزدەستى.
ويىن باستالعانعا دەيىن ستاديونعا جينالعان فۋتبول جانكۇيەرلەرى توبەلەسىپ قالدى، دەپ حابارلايدى قازاقپارات ءتىلشىسى.
بۇل تۋرالى الەۋمەتتىك جەلىدە ۆيدەو تارادى. وبلىستىق پوليتسيا دەپارتامەنتىنىڭ باسپا ءسوز قىزمەتى جانكۇيەرلەر اراسىندا قاقتىعىستىڭ بولعانىن راستادى.
«بۇگىن، 19- ماۋسىم كۇنى ساعات 17:55 شاماسىندا «اتىراۋ- اقتوبە» فۋتبول قۇرامالارىنىڭ ويىنى باستالماس بۇرىن ستاديون الدىندا جانكۇيەرلەر اراسىندا قاقتىعىس ورىن العان. پوليتسيا قىزمەتكەرلەرى قوعامدىق ورىندا قۇقىق بۇزۋشىلىققا جول بەرگەن 30 ادامدى ۇستادى. ولار اتىراۋ قالالىق پوليتسيا باسقارماسىنا جەتكىزىلدى»، - دەپ حابارلادى پوليتسيا دەپارتامەنتىنىڭ باسپا ءسوز قىزمەتى.
وسى وقيعا بويىنشا پوليتسيا قىزمەتكەرلەرى ءتيىستى قۇجاتتاردى جيناقتاپ جاتىر.
«الەۋمەتتىك جەلىدە تاراعان قارۋ قولدانىلعانى تۋرالى اقپارات شىندىققا جاناسپايدى. جالعان اقپاراتقا سەنبەۋ، رەسمي ورگاننىڭ مالىمەتىنە جۇگىنۋ قاجەتتىگىن قاپەرگە سالامىز. قاقتىعىس كەزىندە جانكۇيەرلەردىڭ قولىندا ءتۇرلى- ءتۇستى ءتۇتىن شىعاراتىن دىبىسى بار زات بولعان»، - دەپ ءمالىم ەتتى باسپا ءسوز قىزمەتىنەن.
جانكۇيەرلەر اراسىنداعى جانجال كەزىندە ەشكىم جاراقات الماعان.
ەسكە سالا كەتەلىك، بۇعان دەيىن اتىراۋدا توپىراق ءۇيىندىسىنىڭ استىندا قالعان ەكى ادام قايتىس بولعانىن حابارلاعان ەدىك.
