ش ى ۇ ەلدەرى اراسىندا ساۋدا- ساتتىق ۇلتتىق ۆاليۋتالاردا جۇرگىزىلۋى مۇمكىن

بۇل تۋرالى ش ى ۇ حارتياسىنىڭ 20 جىلدىعىنا ارنالعان «شانحاي ىنتىماقتاستىق ۇيىمى: ورتالىق ازيادان ەۋرازياعا دەيىن» اتتى حالىقارالىق كونفەرەنسيادا ش ى ۇ- داعى قازاقستاننىڭ ۇلتتىق ۇيلەستىرۋشىسى ەرلىك ءالي مالىمدەدى، دەپ حابارلايدى قازاقپارات ءتىلشىسى.

كونفەرەنسيانىڭ نەگىزگى ماقساتى - ەۋرازياداعى ءوزارا بايلانىستى كۇشەيتۋ جولىنداعى ورتالىق ازيانىڭ ساياسي پلاتفورما رەتىندەگى الەۋەتىنە باعا بەرۋ. سونداي- اق تاياۋدا بولاتىن سامارقان سامميتىنە دايىندىق بارىسىندا ءتيىستى باستامالار مەن ۇسىنىستاردى ازىرلەۋ جوسپارلانعان. ناتيجەسىندە ايتىلعان يدەيالار مەن ساراپتامالىق جۇمىستار ۇيىمدى ترانسفورماتسيالاۋدا قولدانىلادى.

بۇدان بولەك، قازاقستاندىق ديپلومات ەرلىك ءالي سامارقاندا وتەتىن سامميت اياسىندا قابىلداناتىن قاۋىپسىزدىك، ەكونوميكالىق جانە مادەني- گۋمانيتارلىق سالالارداعى قۇجاتتاردىڭ ماڭىزدىلىعىنا توقتالدى.

«ەكونوميكالىق تۇرعىدان العاندا، ورتالىق ازيا ايماعىنىڭ بارلىق ەلدەرى ءبىر- بىرىمەن تىعىز بايلانىستى. سايكەسىنشە ءبىر ەلدە قولعا الىنعان ىستەر باسقا مەملەكەتتەرگە دە اسەر ەتەدى. قىتاي، قىرعىزستان جانە وزبەكستانمەن اراداعى تەمىرجول ءترانزيتىن دامىتۋعا قاتىستى ماسەلەلەر بار. مۇنى بارلىق ەلدەر قولداپ وتىر. اتاپ ايتقاندا، رەسەي مەن قازاقستان وسى جوبالارعا قوسىلۋعا دايىن. سامارقان ءسامميتى شەڭبەرىندە ۇلتتىق ۆاليۋتالاردا ءوزارا ەسەپ ايىرىسۋ تۋرالى ۇسىنىس تا قابىلدانادى. جاھاندىق قارجى نارىعى شايقالعان كەزدە مۇنىڭ قانشالىقتى ماڭىزدى ەكەنىن ءوزىڭىز تۇسىنەسىز» ، ‑ دەدى ەرلىك ءالي.

حالىقارالىق كونفەرەنسياعا ش ى ۇ- عا مۇشە ەلدەردىڭ ۇلتتىق ۇيلەستىرۋشىلەرى، تەرروريزمگە قارسى وڭىرلىك ۇيىم وكىلدەرى جانە 10 عا جۋىق ەلدىڭ جەتەكشى ساراپشىلارى قاتىستى.

ەسكە سالا كەتەيىك، سامارقاندا وتەتىن شانحاي ىنتىماقتاستىق ۇيىمىنا مۇشە مەملەكەتتەردىڭ سامميتىندە ءبىرقاتار ەلدىڭ ۇيىمعا كىرۋ ءوتىنىمى قارالادى.

سونىمەن قاتار، ۇيىمنىڭ قۇرىلعانىنا 21 جىل تولۋىنا وراي وزبەكستان استاناسىندا «ش ى ۇ حالىقتارىنىڭ مۋزىكا كەشى» كونسەرتى ءوتتى.