دۇنيەجۇزىلىك ساۋدا ۇيىمىن رەفورمالاۋ پروتسەسىن باستاۋ كەلىسىلدى
ق ر ساۋدا جانە ينتەگراتسيا مينيسترلىگىنەن ءمالىم ەتكەندەي، د س ۇ- نىڭ 12- مينيسترلىك كونفەرەنتسياسىنىڭ ءتوراعاسى جانە تەڭ ۇيىمداستىرۋشىسى - قازاقستان رەسپۋبليكاسى.
كونفەرەنتسيانىڭ ءتوراعاسى قىزمەتىن قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ اتقاردى.
بەس كۇنگە جالعاسقان ۇيىمعا مۇشە 164 ەلدىڭ قارقىندى كەلىسسوزدەرى ءوز جەمىسىن بەردى.
ناتيجەسىندە الەمدىك ساۋدا ءۇشىن ماڭىزدى ماسەلەلەردىڭ بۇرىن-سوڭدى بولماعان سانى بويىنشا كونسەنسۋسقا قول جەتكىزدى.
اتاپ ايتقاندا، - د س ۇ- نى رەفورمالاۋ پروتسەسىن باستاۋ؛
- د س ۇ- نىڭ COVID-19 پاندەمياسىنا دەن قويۋ شارالارى جانە بولاشاق پاندەمياعا دايىندىعى تۋرالى مينيسترلىك دەكلاراتسياسىن قابىلداۋ؛
- د س ۇ- نىڭ زياتكەرلىك مەنشىك قۇقىقتارىنىڭ ساۋدا اسپەكتىلەرى جونىندەگى كەلىسىمى بويىنشا مينيسترلىك شەشىمىن (تريپس) قابىلداۋ؛
- ازىق-تۇلىك قاۋىپسىزدىگىنە جەدەل دەن قويۋ شارالارى تۋرالى مينيسترلىك دەكلاراتسياسىن قابىلداۋ؛
- ازىق-تۇلىك ساتىپ الۋدى دۇنيەجۇزىلىك ازىق-تۇلىك باعدارلاماسىمەن ەكسپورتتىق تىيىمدار مەن شەكتەۋلەردەن بوساتۋ تۋرالى مينيسترلىك شەشىمىن قابىلداۋ؛
- ەلەكتروندىق ساۋدا جونىندەگى جۇمىس باعدارلاماسىن قابىلداۋ؛
- د س ۇ- نىڭ بالىق اۋلاۋعا ارنالعان سۋبسيديالار تۋرالى جاڭا كەلىسىمىن قابىلداۋ.
سوڭعى ماسەلە بويىنشا كەلىسسوزدەر 20 جىلدان استام ۋاقىتقا سوزىلعانىن اتاپ وتكەن ءجون.
مينيسترلىك كونفەرەنتسياسى 15- ماۋسىمدا اياقتالۋى كەرەك ەدى، ءبىراق مينيسترلەر كونفەرەنتسيانى ءبىر كۇنگە ۇزارتۋعا كەلىسكەن.
ايتا كەتەيىك، د س ۇ- عا مۇشە ەلدەر 2018-جىلدىڭ كۇزىندە د س ۇ- نىڭ 12-مينيسترلىك كونفەرەنتسياسىنا ءتوراعالىق ەتۋشى جانە قابىلداۋشى تاراپ رەتىندە قازاقستاندى ءبىراۋىزدان سايلادى.
كونفەرەنتسيا نۇر-سۇلتان قالاسىندا 2020-جىلدىڭ ماۋسىم ايىندا وتكىزىلۋى ءتيىس ەدى. كوروناۆيرۋس پاندەمياسىنا بايلانىستى ول كەيىنگە شەگەرىلدى.
