شارىن جانە التىنەمەل ۇلتتىق پاركتەرىنە ءبىر جىلدا قانشا تۋريست كەلدى

بۇل تۋرالى بۇگىن ەلوردادا وتكەن «ۇلتتىق پاركتەر: ەكولوگيالىق تۋريزمنىڭ جاڭا مودەلى» اتتى دوڭگەلەك ۇستەل وتىرىسىندا ايتىلدى، دەپ حابارلايدى قازاقپارات ءتىلشىسى.

«بۇگىندە التىنەمەل جانە شارىن ۇلتتىق پاركتەرى اۋماعىندا ىشۋگە بولاتىن سۋبۇرقاقتار، دەمالىس ورىندىقتارى، قوقىس جاشىكتەر قويىلىپ، اقپاراتتىق تاقتايشالار ءىلىندى. ەندىگى ۋاقىتتا اتالعان ۇلتتىق پاركتەر اۋماعىندا قازاق اۋىلىن، گلەمپينگ، كەمپينگ سالۋ جوسپارلانىپ وتىر. ۇلتتىق پاركتەر اۋماعىنا جەتۋ ماسەلەسى دە شەشىلگەن. ياعني پارك اۋماعىنا دەيىن اسفالت توسەلدى، ودان ءارى بولمايدى. سەبەبى پارك ىشىندەگى اڭ، جانۋارلاردىڭ شىرقىن بۇزباۋ ماڭىزدى»، - دەدى «QazaqGeography» رەسپۋبليكالىق قوعامدىق بىرلەستىگىنىڭ التىنەمەل جانە شارىن ۇلتتىق پاركىندە تۋريستىك ينفراقۇرىلىمدى قۇرۋ جانە دامىتۋ جوباسىنىڭ جەتەكشىسى توميريس مۇسايەۆا.

ونىڭ ايتۋىنشا، اتالعان ەكى ۇلتتىق پاركىن تاماشالاۋعا كورشى ەلدەردىڭ اراسىنان رەسەيدەن تۋريستەر ءجيى كەلەدى.

«وتكەن جىلى شارىن ۇلتتىق پاركىنە 40 مىڭعا جۋىق تۋريست كەلدى، ال التىنەمەلدى 20 مىڭعا جۋىق كەلۋشى تاماشالادى»، - دەيدى ول.

بۇعان دەيىن شارىن مەملەكەتتىك ۇلتتىق تابيعي پاركى اۋماعىندا ءتۋريزمدى دامىتۋ ماقساتىندا 4,5 ميلليارد تەڭگە ينۆەستيتسيا تارتىلعانى تۋرالى حابارلاعان ەدىك. سونداي-اق، دوڭگەلەك ۇستەل بارىسىندا ۇلتتىق پاركتەردە 685 شاقىرىمدىق تۋريستىك مارشرۋت جاسالعانى ايتىلدى.