قىتاي ۇشاق تاسيتىن ءۇشىنشى ءىرى اسكەري كەمەنى قۇراستىردى

None
None
نۇر- سۇلتان. قازاقپارات - قىتايدىڭ شينحۋا اقپارات اگەنتتىگىنىڭ حابارلاۋىنشا، 17 -ماۋسىمدا قىتاي اسكەري- تەڭىز كۇشتەرىنىڭ ءۇشىنشى ۇشاق تاسىعىشىنىڭ قۇرىلىسى اياقتالدى، دەپ حابارلايدى قازاقپارات.

قىتاي ورتالىق اسكەري كەڭەسىنىڭ بۇيرىعىنا سايكەس، جاڭادان جاسالعان ۇلكەن اسكەري كەمە «حالىق ازاتتىق ارمياسى تەڭىز فلوتىنىڭ فۋجيان كەمەسى» دەپ اتالىپ، اسكەري كەمەگە «18» دەگەن ءنومىر بەرىلدى.

كەمەنىڭ جالپى سالماعى 80 مىڭ توننانى قۇرايدى، ال ونىڭ ناقتى قانشا ۇشاق تاسىمالدايتىنى ءالى بەلگىسىز.

اسكەري كەمە 2024 -جىلى رەسمي تۇردە پايدالانۋعا بەرىلۋى مۇمكىن.

شينحۋا اگەنتتىگىنىڭ حابارلاۋىنشا، بۇل اسكەري كەمەنى قىتايدىڭ ءوزى جوبالاپ، جاساعان.

ايتا كەتەتىن جايت، قىتاي 2005 -جىلى ۋكراينادان ۆارياگ كەمەسىن ساتىپ الىپ، ونى جوندەپ، «لياونين» دەپ اتالاتىن تۇڭعىش ۇشاق تاسىعىش كەمەسىن جاساپ شىعارعان بولاتىن. كەمە 2012 -جىلى پايدالانۋعا بەرىلگەن. بۇل ۇشاق تاسىعىش كەمەسى 24 جويعىش ۇشاقتى تاسىمالداي الادى.

قىتاي ءوزىنىڭ ەكىنشى ۇشاق تاسىعىش كەمەسىنىڭ قۇرىلىسىن 2017 -جىلى اياقتادى، ال كەيىنىرەك «شاندۋڭ» دەپ اتالاتىن ۇشاق تاسىعىش كەمەسى (№ 17) 2019 -جىلى پايدالانۋعا بەرىلگەن. «لياونيڭ» كەمەسىمەن سالىستىرعاندا، «شاندۋڭ» كەمەسى تاسىمالداي الاتىن جويعىش ۇشاقتىڭ سانى 36 عا دەيىن ۇلعايدى.

South China Morning Post گازەتىنىڭ حابارلاۋىنشا، قىتاي ءبىرىنشى كەزەڭدە ءتورت ۇشاق تاسىعىش كەمەسىن جاساۋدى جوسپارلاپ وتىر. قىتاي كەلەسى كەزەڭدە اتومدىق ۇشاق تاسىعىشىن سالۋى مۇمكىن دەگەن بولجام بار.

اۆتور مۇحتار مۇرات

سوڭعى جاڭالىقتار