«بۋراباي» ۇلتتىق پاركى مەن مارقاكول قورىعى يۋنەسكو- نىڭ جاھاندىق جەلىسىنە قوسىلدى

پاريج. قازاقپارات - «بۋراباي» مەملەكەتتىك ۇلتتىق تابيعي پاركى جانە مارقاكول مەملەكەتتىك تابيعي قورىعى يۋنەسكو- نىڭ بيوسفەرالىق رەزەرۆاتتارىنىڭ جاھاندىق جەلىسىنە قوسىلدى.

بۇل تۋرالى ق ر سىرتقى ىستەر مينيسترلىگىنەن ءمالىم ەتىلدى، دەپ حابارلايدى قازاقپارات.

اقپاراتقا سايكەس، 13-17-ماۋسىم ارالىعىندا پاريجدە ءوتىپ جاتقان «ادام جانە بيوسفەرا» يۋنەسكو باعدارلاماسىنىڭ حالىقارالىق ۇيلەستىرۋ كەڭەسىنىڭ 34- سەسسياسى شەڭبەرىندە «بۋراباي» مەملەكەتتىك ۇلتتىق تابيعي پاركىن (اقمولا وبلىسى) جانە مارقاكول مەملەكەتتىك تابيعي قورىعىن (شىعىس قازاقستان وبلىسى) يۋنەسكو- نىڭ بيوسفەرالىق رەزەرۆاتتارىنىڭ جاھاندىق جەلىسىنە قوسۋ تۋرالى شەشىم قابىلداندى.

سەسسيا جۇمىسىنا قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى، قازاقستان رەسپۋبليكاسىنىڭ يۋنەسكو جانىنداعى تۇراقتى وكىلدىگىنىڭ ديپلوماتتارى، «ادام جانە بيوسفەرا» جونىندەگى ۇلتتىق كوميتەتتىڭ ءتوراعاسى رومان ياشەنكو جانە ونىڭ ورىنباسارى ۆيكتوريا يلينا قاتىستى. پرەزيدەنتتىڭ ءىس باسقارۋشىسى ايبەك دادەبايەۆ بۇل مارتەبە قانداي ارتىقشىلىقتار بەرەتىنىن ايتىپ ءوتتى.

«جاڭا مارتەبە قورشاعان ورتانى قورعاۋ ماسەلەلەرى بويىنشا حالىقارالىق شەشىمدەر قابىلداۋعا قاتىسۋعا، زەرتتەۋ جانە قولدانبالى جۇمىستاردى دامىتۋعا، ەكولوگيالىق وقۋ- اعارتۋ مەن مامانداردى دايارلاۋدىڭ نەگىزىن قالىپتاستىرۋعا مۇمكىندىك بەرەدى»، - دەدى ول.

ايتا كەتەيىك، بۇگىنگى تاڭدا قازاقستانداعى يۋنەسكو بيوسفەرالىق رەزەرۆاتتارىنىڭ ۇلتتىق جەلىسىنە 15 وبەكتى ەنگىزىلگەن. ال دۇنيەجۇزىلىك بيوسفەرالىق رەزەرۆاتتار جەلىسىنە الەمنىڭ 131 ەلىنىڭ اۋماعىندا ورنالاسقان 738 بيوسفەرالىق رەزەرۆات كىرەدى.