ەل تاعدىرىن ايقىنداعان تاريحي وقيعالارعا لايىقتى باعا بەرگەن ءجون - توقايەۆ
بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«جالپىۇلتتىق بىرەگەيلىگىمىزدى نىعايتا ءتۇسۋ - ەڭ باستى مىندەتتىڭ ءبىرى. جاڭا قازاقستان دەگەنىمىز - ەڭ الدىمەن، قۇندىلىقتاردىڭ جاڭارۋى، سونداي-اق قوعامداعى قارىم-قاتىناس مادەنيەتىنىڭ وزگەرۋى. مەن وسىعان دەيىن دە بۇل تۋرالى بىرنەشە رەت ايتتىم. تاعى ءبىر ماڭىزدى جۇمىس - بۇل تاريحي ادىلدىك ورناتۋ. ءبىر كەزدەرى ۇمىتىلىپ كەتكەن ۇلت پەرزەنتتەرىنىڭ ەسىمىن قايتا جاڭعىرتۋىمىز كەرەك»، - دەدى قاسىم-جومارت توقايەۆ.
وسى ورايدا مەملەكەت باسشىسى ەل تاعدىرىن ايقىنداعان تاريحي وقيعالارعا لايىقتى باعا بەرۋدىڭ ماڭىزدىلىعىن اتاپ ءوتتى.
«سوڭعى ەكى جىلدا بۇل باعىتتا كوپتەگەن جۇمىس اتقارىلدى. ۇلتىمىزدىڭ كورنەكتى تۇلعالارىنىڭ ەسىمى ارداقتالدى، تاريحي داتالار قالپىنا كەلتىرىلدى. وسىلايشا، ەلىمىزدىڭ شىنايى شەجىرەسى جازىلىپ جاتىر. وتكەنگە ءادىل باعا بەرىلمەسە، جارقىن بولاشاقتان ءۇمىت كۇتۋ قيىن. مۇنى تەرەڭ تۇسىنگەن ابزال»، - دەدى پرەزيدەنت.
