پرەزيدەنت ۇلىتاۋدىڭ ەتەگىندە رامىزدەر الاڭىن اشۋدى تاپسىردى
«ۇلتتىق قۇرىلتايدىڭ ۇلىتاۋعا باستالعانى دۇرىس بولدى. كيەلى ولكەمىز جاڭا قازاقستاندى قۇرۋ جولىنداعى بىرلىكتىڭ سيمۆولىنا اينالدى. وسى ورايدا مەن تاعى ءبىر ماڭىزدى باستاما كوتەرگىم كەلەدى. بۇل جەردە بۇكىل رۋلاردىڭ تاڭباسى تاسقا جازىلعان. سول ارقىلى بابالارىمىز ۇلت بىرلىگىن كورسەتكەن»، - دەدى مەملەكەت باسشىسى.
قاسىم-جومارت توقايەۆ ۇلىتاۋ جەرىندەگى تاڭبالى تاستىڭ تاريحي ءرولى تۋرالى قانىش ساتپايەۆتىڭ ايتقان قاناتتى ءسوزىن مىسالعا كەلتىردى.
«قانىش ساتپايەۆ «ەلىمىزدىڭ تۋ تىككەن جەرى - تاڭبالى تاس دەگەن. وكىنىشكە قاراي، قاستەرلى جازۋلار كەيىن ابدەن ءبۇلىندى. ەل ازاماتتارى ۇلىتاۋعا ەسكەرتكىش قويىپ، تاستاعى تاڭبالاردى جاڭعىرتتى. ءبىراق بۇل جەتكىلىكسىز دەپ ويلايمىن. مۇنداي قازاقتىڭ بىرلىگىن ايگىلەيتىن ساۋلەتتى نىسان تۇرۋ كەرەك. مەن اۋليە تاۋدىڭ ەتەگىندە مەملەكەتتىك رامىزدەر الاڭىن اشۋدى تاپسىرامىن. قاسيەتتى وڭىردە كوك بايراعىمىز اسقاقتاپ تۇرۋى ءتيىس»، - دەدى قاسىم-جومارت توقايەۆ.
