پرەزيدەنت قازاق ءتىلىنىڭ جاڭا ورفوگرافياسى تۋرالى ارنايى ەڭبەك ازىرلەۋدى تاپسىردى
«مەن ءتىل ءبىلىمى ينستيتۋتىنا قازاق ءتىلىنىڭ جاڭا ورفوگرافياسى تۋرالى ارنايى ەڭبەك ازىرلەۋدى تاپسىردىم. سودان كەيىن عانا لاتىن الىپبيىنە اۋىسۋ جونىندە ايتۋعا بولادى»، - دەدى قاسىم-جومارت توقايەۆ.
وسى ورايدا پرەزيدەنت ءۇستىرت جاسالعان ءتىل رەفورماسىنىڭ قاجەتى جوق ەكەنىن قاداپ ايتتى.
«اسىعىستىققا جول بەرمەۋىمىز كەرەك. ءتىپتى، كوشەدەگى بيلبوردتار مەن مينيسترلىكتەردىڭ اتاۋىنا قاراساق تا جەتكىلىكتى. ءتىلىمىز بۇرمالانىپ كەتتى. اشىعىن ايتۋ كەرەك، بۇل قازاق ءتىلىنىڭ تابيعاتىنا جات، ءتىپتى، ءتىلىمىزدى مازاق قىلۋ سياقتى كورىنەدى. مۇنداي ءۇستىرت جاسالعان ءتىل رەفورماسىنىڭ قاجەتى جوق. بىزگە ناقتى رەفورما كەرەك. ءتىل - ۇلتتىڭ جانى. وعان نەمقۇرايلى قاراۋعا مۇلدەم بولمايدى. سوندىقتان ءبىز ءتىلىمىزدىڭ مارتەبەسىن ارتتىراتىن گرافيكانى عانا قابىلدايمىز»، - دەدى پرەزيدەنت.
بۇدان بۇرىن حابارلانعانداي، مەملەكەت باسشىسى لاتىن الىپبيىنە كوشۋدە جان-جاقتى، تەرەڭ تالداۋ جاساپ بارىپ، تۇبەگەيلى شەشىم قابىلداعان ابزال ەكەنىن ايتتى.
