ەرلان قوشانوۆ: ادىلەتتى قازاقستاننىڭ باستى كورىنىسى - ءادىل سايلاۋ
بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.
«ادىلەتتى قازاقستاننىڭ باستى كورىنىسى - ءادىل سايلاۋ. وسى ورايدا جاڭا قازاقستاننىڭ العاشقى ساياسي ناۋقانى بۇرىن-سوڭدى بولماعان اشىقتىق، ادىلدىك جاعدايىندا وتكەنى ءمالىم. رەفەرەندۋم اسقان بەلسەندىلىكپەن، اكىمشىلىك كۇشتەۋسىز، نىعىزداۋسىز، حالىقتى ابىگەرگە سالماي وتكىزىلدى. ونىڭ قورىتىندىلارىن بۇرىندارى ەلدەگى سايلاۋ ۇدەرىسىن ۇنەمى سىناپ كەلگەن حالىقارالىق ۇيىمداردىڭ ءوزى وڭ كوزبەن قابىلداپ، وڭ باعا بەرىپ جاتىر. ءتىپتى، ەلىمىزدەگى اسىرە سىنشىل توپتاردىڭ ءوزى دە وزگەرىستەردىڭ دۇرىس جاقتا ءوربىپ وتىرعانىن مويىنداۋعا ءماجبۇر بولدى. بۇنىڭ ءوزى ايقىنداعان ستراتەگيالىق باعىتتىڭ دۇرىس ەكەنىن دالەلدەپ وتىر. جالپى العاندا، ءبىز مىنانى ايقىن ءتۇسىنىپ-ءتۇيسىنىپ العانىمىز ابزال - زامان تۇبەگەيلى وزگەرىپ جاتىر»، - دەدى ە. قوشانوۆ.
ونىڭ پايىمىنشا، ءبىز ءومىردىڭ وزگەرگەنىن، قوعامنىڭ وزگەرگەنىن ەسكەرە وتىرىپ، ءوزىمىز وزگەرە باستاۋعا مىندەتتىمىز.
«جاڭا قازاقستان دۇنيەگە جارلىقپەن كەلمەيدى، بىرلىكپەن، ىنتىماقپەن، قاجىرلى ەڭبەكپەن عانا كەلەدى. بۇل - بارشامىزدان زور جاۋاپكەرشىلىكتى، تاباندىلىقتى، شىنايىلىقتى، پرينتسيپشىلدىكتى قاجەت ەتەتىن جاۋاپتى ميسسيا»، - دەدى ءماجىلىس ءتوراعاسى.
«تاريحي رەفەرەندۋم ەلىمىزدە ۇزاق جىلدار بويى قالىپتاسقان سەنىمسىزدىك سەڭىن بۇزىپ، بيلىك پەن حالىقتىڭ اراسىنداعى ءوزارا سەنىمدى نىعايتا ءتۇستى. ەلىمىزدىڭ بولاشاق تاريحىن ايقىندايتىن ماڭىزدى قۇجاتتىڭ تاعدىرىن شەشۋدى پرەزيدەنت حالقىنا سەنىپ تاپسىرسا، حالىقتىڭ ءدۇيىم كوپشىلىگى ءوز كوشباسشىسىنا بەرگەن سەنىم مانداتىن جاڭارتتى. بۇل - وزىنە-ءوزى سەنىمدى كۇشتى بيلىك پەن ءوز تاعدىرىن ءوز قولىنا الا باستاعان اشىق جانە جاۋاپتى قوعامنىڭ ساياسي سەرتى. ءبىز بۇل تاعلىمى زور تاڭداۋدان - ەلىمىزدىڭ ىشكى جانە سىرتقى ساياساتىنىڭ دۇرىس باعىتتا ەكەنىن انىق كوردىك! كونستيتۋتسيالىق وزگەرىستەر رەفورمالاردىڭ سوڭى ەمەس، ۇلكەن جولدىڭ، ساياسي ترانسفورماتسيانىڭ باسى عانا ەكەنىن جۋىردا مەملەكەت باسشىسى عىلىم اكادەمياسىندا سويلەگەن سوزىندە ايتقان بولاتىن»، - دەدى ەرلان قوشانوۆ.
