ءاليحان بايمەن جەر قويناۋىن پايدالانۋشىلارعا بەرىلەتىن جەڭىلدىكتەرگە ريەۆيزيا جاساۋدى ۇسىندى

None
None
ۇلىتاۋ. قازاقپارات - ۇلتتىق قۇرىلتاي مۇشەسى، مەملەكەت قايراتكەرى ءاليحان بايمەن جەر قويناۋىن پايدالانۋشىلارعا بەرىلەتىن جەڭىلدىكتەرگە ريەۆيزيا جاساۋدى ۇسىندى، دەپ حابارلايدى قازاقپارات ءتىلشىسى.

«ادامي كاپيتال دامۋىندا ەكونوميكالىق ساياساتتىڭ ورنى ەرەكشە. مەملەكەت باسشىسىنىڭ مونوپوليادان ارىلۋعا باعىتتالعان باتىل شەشىمدەرى قوعامدىق پسيحولوگياعا دا اسەر ەتىپ، الپاۋىت وليگارحتار ەلدىڭ يەسى - ۇلت بار ەكەنىن سەزە باستاعانداي» - دەدى ول ۇلىتاۋداعى ۇلتتىق قۇرىلتايدىڭ العاشقى وتىرىسىندا.

سونداي-اق ول رەفەرەندۋم ارقىلى جەر مەن جەر قويناۋىنىڭ يەسى حالىق ەكەنى بەكىتىلگەنىن ەسكە سالدى.

«ەندى جەر قويناۋىن پايدالانۋ كونتراكتىلەرى جاريا بولۋىن مىندەتتەيتىن زاڭدار قاجەت. ەكىنشىدەن، ۇكىمەت وسى كۇنگە دەيىن بەرىلىپ كەلگەن سالىقتىق، كەدەندىك، باسقا جەڭىلدىكتەرگە ريەۆيزيا جاساپ، ارنايى كوميسسيا قايتا شەشىم قابىلداعانشا ولاردىڭ بەرىلۋىن توقتاتا تۇرۋ دۇرىس دەپ ەسەپتەيمىن»، - دەدى ءاليحان بايمەن.

ايتا كەتەيىك، پرەزيدەنت ۇلىتاۋ وبلىسىنداعى جۇمىس ساپارى اياسىندا ۇلتتىق قۇرىلتايدىڭ العاشقى وتىرىسىنا قاتىسىپ جاتىر.

كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.

ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن ق ح ا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار.

سوڭعى جاڭالىقتار