ءبىز كوپتى كورگەن ەل اعالارىنىڭ اقىل-كەڭەسىنە جۇگىنەمىز - پرەزيدەنت
بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«وبلىستىڭ العاشقى قادامى القالى جيىننان باستالۋدا. ۇلت ۇياسى ۇلىتاۋدىڭ عاسىرلار بويعى ۇلى ميسسياسى قايتا جالعاسىن تاپتى. ەندى، ۇلتتىق قۇرىلتايدىڭ جۇمىسىن ۇيىمداستىرۋ ماسەلەسىنە توقتالسام. ونىڭ قۇرامىندا 117 ادام بار. قۇرىلتايعا بارلىق وبلىستىڭ، سان ءتۇرلى سالانىڭ، ءار بۋىننىڭ وكىلدەرى قاتىسىپ وتىر. ءبىز كوپتى كورگەن ەل اعالارىنىڭ اقىل-كەڭەسىنە جۇگىنەمىز. بەلسەندى ازاماتتىق ۇستانىمى بار ورتا بۋىننىڭ تاجىريبەسىن ەسكەرەمىز. جاڭاشا ويلايتىن جاستاردىڭ تىڭ يدەيالارىن قولدايمىز»، - دەدى قاسىم-جومارت توقايەۆ.
وسى ورايدا پرەزيدەنت قۇرىلتايعا پارلامەنت دەپۋتاتتارى، ساياسي پارتيالار مەن قازاقستان حالقى اسسامبلەياسىنىڭ مۇشەلەرى دە شاقىرىلعانىن ەسكە سالدى.
ايتا كەتەيىك، پرەزيدەنت ۇلىتاۋ وبلىسىنداعى جۇمىس ساپارى اياسىندا ۇلتتىق قۇرىلتايدىڭ العاشقى وتىرىسىنا قاتىسىپ جاتىر.
كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.
ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن ق ح ا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار.
