قازاق تىلىندە روبوتوتەحنيكا سالالارىنا قاتىستى جاڭا تەرميندەر پايدا بولدى

ەندى قازاق تىلىندە جاساندى ينتەللەكت، دەرەكتەردى تالداۋ، روبوتوتەحنيكا جانە كومپيۋتەرلىك عىلىمدار سالاسىندا قولدانىلاتىن كوپتەگەن تەرميندەر مەن سوزدەردىڭ اۋدارمالارى بار. عالىمدار تەرميندەردى اعىلشىن تىلىنەن قازاق تىلىنە اۋدارۋدىڭ ءارتۇرلى نۇسقالارىن قامتيتىن گلوسساري ازىرلەدى. ونى ءتىل ساياساتى جونىندەگى كوميتەتكە بەكىتۋگە جىبەردى.

«ءبىز جاساندى ينتەللەكت، دەرەكتەر تالداۋ جانە روبوتوتەحنيكا سالاسىنداعى كوپتەگەن تەرميندەردىڭ قازاق تىلىندە رەسمي بەكىتىلگەن اۋدارماسى جوق ەكەنىن بايقادىق. سوندىقتان تەرميندەردى قازاق تىلىنە اۋدارۋدى باستادىق. جاساندى ينتەللەكت پەن روبوتوتەحنيكا سالاسى قازاقستاندا بەلسەندى دامىپ جانە كەڭ تارالعاندىقتان، تەرميندەردىڭ اۋدارماسىن ۇسىندىق»، - دەدى ISSAI نەگىزىن قالاۋشى جانە ديرەكتورى، پروفەسسور اتاكان ۆارول.

لينگۆيستيكا سالاسىنداعى ساراپشىلار مەن ISSAI ماماندارىنىڭ قاتىسۋىمەن وتكەن رەسپۋبليكالىق تەرمينولوگيالىق كوميسسيانىڭ وتىرىستارى بارىسىندا كەيبىر سوزدەر اۋدارماسىز قابىلداندى جانە وزىندىك اعىلشىن تىلىندەگى ايتىلۋىن ساقتاپ قالدى.

قالعاندارى رەسمي تۇردە قازاقشاعا اۋدارىلدى. مىسالى، artificial neural network تەرمينى «جاسىل نەيروندىق جەلى» دەپ اۋدارىلدى، ال boosting تەرمينى قارىزعا الىنعان ءسوز - بۋستينگ رەتىندە پايدالانۋعا شەشىم قابىلداندى. بارلىعى 672 ءسوز رەسمي تۇردە بەكىتىلدى.

«ءبىز سيفرلىق ورتادا قازاق ءتىلىنىڭ دامۋىنا ۇلەس قوسا العانىمىزعا وتە قۋانىشتىمىز»، - دەپ قوستى پروفەسسور ۆارول. بەكىتىلگەن تەرميندەر ISSAI جانە termincom.kz سايتتارىندا قول جەتىمدى.