قىتاي تاراپى قازاقستاندىقتار ءۇشىن بەلگىلى ءبىر ۆيزالاردى قايتا راسىمدەيتىن بولادى

الماتى. قازاقپارات - قىتاي تاراپىمەن ءارتۇرلى دەڭگەيدە وتكىزىلگەن تۇراقتى كەلىسسوزدەردىڭ ناتيجەسىندە قازاقستان ازاماتتارى ءۇشىن ق ح ر-دىڭ بەلگىلى ءبىر ساناتتاعى ۆيزالارىن راسىمدەۋدى قايتا باستاۋ تۋرالى ۋاعدالاستىققا قول جەتكىزىلدى.

بۇل رەتتە، قىتاي حالىق رەسپۋبليكاسىنىڭ نۇر-سۇلتان قالاسىنداعى ەلشىلىگى مەن الماتى قالاسىنداعى باس كونسۋلدىعىندا تومەندە كورسەتىلگەن تالاپتارعا ساي كەلەتىن قازاقستان ازاماتتارى ءۇشىن ق ح ر ۆيزالارى بەرىلەدى:

1. ورتالىق جانە مەملەكەتتىك ورگانداردان، پروۆينتسيالىق سىرتقى ىستەر كەڭسەلەرى مەن ساۋدا دەپارتامەنتتەرىنەن، ءىرى كاسىپورىنداردان نەمەسە مۋنيتسيپالدى حالىق ۇكىمەتتەرىنەن رەسمي شاقىرۋ العان تۇلعالار.

2. قىتايداعى قۇزىرلى ورگانداردىڭ كەلىسىمىمەن جۇمىسقا رۇقسات العان تۇلعالار، «Z» ساناتىنداعى ۆيزا الۋشىلار شاقىرۋ حاتى بولماسا دا ءوتىنىش بەرە الادى.

3. قىتايعا جۇمىس ىستەۋگە ورالعان قازاقستاندىقتاردىڭ وتباسى مۇشەلەرى شاقىرۋ حاتى بولماسا دا تۋىستىقتى دالەلدەيتىن قۇجاتتار نەگىزىندە ۆيزا الۋعا ءوتىنىش بەرۋىنە بولادى.

4. قىتاي ازاماتتارىنىڭ شەتەلدىك وتباسى مۇشەلەرى جانە قىتايدا تۇراقتى تۇراتىن شەتەلدىكتەر وتباسىمەن قوسىلۋعا ءوتىنىش بەرە الادى نەمەسە تۋىستىعىن دالەلدەيتىن قۇجاتتاردىڭ نەگىزىندە قىتايعا كەلۋگە ۆيزا الۋىنا بولادى.

سونىمەن قاتار، قىتاي تاراپى 2022-2023 وقۋ جىلىنا قازاقستاندىق ستۋدەنتتەردىڭ قىتاي اۋماعىنا كەلىپ وقۋلارىن جالعاستىرۋى بويىنشا ءوزارا تىعىز ىنتىماقتاستىققا دايىن ەكەنىن ءبىلدىردى. ستۋدەنتتەرگە وقۋ ۆيزاسىن راسىمدەۋ ءۇشىن «جاسىل ءدالىز» (جەڭىلدەتىلگەن ءتارتىپ بويىنشا) اشۋ تۋرالى كەلىسىمگە قول جەتكىزىلدى.

بۇدان بولەك، قىتاي تاراپىنان ازاماتتاردىڭ قۇجاتتارىن كونسۋلدىق زاڭداستىرۋعا قابىلداۋ بويىنشا كەلىسىم الىندى. ءوتىنىش بەرۋشىلەر الدىمەن ءتيىستى قۇجاتتاردىڭ سكانەرلەنگەن توپتاماسىن نۇر-سۇلتانداعى ق ح ر ەلشىلىگىنىڭ نەمەسە الماتىداعى ق ح ر باس كونسۋلدىعىنىڭ ەلەكتروندىق پوشتاسىنا جىبەرۋى قاجەت (ق ر ازاماتىنىڭ ءتولقۇجاتى، ق ر سىرتقى ىستەر مينيسترلىگى كۋالاندىرعان قۇجاتتار، تولتىرىلعان ساۋالناما جانە ت. ب.). ەلەكتروندىق پوشتاعا جىبەرىلگەن قۇجاتتاردىڭ توپتاماسى دۇرىس بولسا، ءتيىستى كونسۋلدىق الىمدى تولەپ، قۇجاتتاردىڭ ءتۇپنۇسقاسىن كونسۋلدىق ءبولىمنىڭ مەكەنجايىنا جىبەرۋ كەرەك. قۇجاتتاردى قاراۋ مەرزىمى - 7 جۇمىس كۇنىن قۇرايدى.

قىتاي ۆيزالارىن الۋ، سونداي-اق قۇجاتتاردى زاڭداستىرۋ تۋرالى تولىق اقپاراتتى قىتاي حالىق رەسپۋبليكاسىنىڭ ەلشىلىگى مەن باس كونسۋلدىعىنىڭ ۆەب- سايتتارىنان كەلەسى سىلتەمەلەر بويىنشا الۋعا بولادى:

http://kz.china-embassy.gov.cn/rus/lsfw/202205/t20220530_10694650.htm

http://kz.china-embassy.gov.cn/rus/lsfw/202205/t20220530_10694653.htm

http://almaty.china-consulate.gov.cn/rus/lsyw/202205/t20220525_10692606.htm

سونىمەن قاتار، قىتاي اۋماعىنا كىرۋ ءۇشىن https://hrhk.cs.mfa.gov.cn/H5/ ۆەب- سايتىنا تىركەلىپ، ارنايى فورمانى تولتىرۋ ارقىلى «جاسىل كودتى» الۋ تالابىنىڭ ساقتالاتىنىن اتاپ وتەمىز.

اتالعان پورتالعا كەلەسى قۇجاتتاردىڭ كوشىرمەلەرى جۇكتەلۋى ءتيىس:

پاسپورت،

ۆيزا، شاقىرتۋ، جۇمىسقا رۇقسات،

اۋە بيلەت،

ۇشاققا وتىرۋدان 48 جانە 12 ساعات بۇرىن جاسالعان ەكى مارتەلىك پ ت ر سىناقتارىنىڭ ناتيجەلەرى.

ۇشاققا وتىرۋدىڭ الدىندا IgG جانە IgM انتيدەنەلەرىنە تەست تاپسىرۋ قاجەت ەمەس. تولىق اقپاراتتى تومەندەگى سىلتەمە ارقىلى الۋعا بولادى:

(http://kz.china-embassy.gov.cn/rus/lsfw/202205/t20220530_10694657.htm) .

سونداي- اق ق ح ر- داعى ەپيدەميولوگيالىق تالاپتارعا سايكەس، شەتەلدەن قىتايعا كەلەتىن بارلىق ازاماتتار ءوز قاراجاتى ەسەبىنەن ارنايى قوناقۇيدە 14 كۇندىك كارانتيننەن ءوتۋى قاجەت. شەتەلدەن كەلگەن ازاماتتار قوناقۇيگە تىركەلۋ بارىسىندا قىتاي جانە اعىلشىن تىلدەرىندە بەكىتىلگەن كارانتيندىك شارالاردى ساقتاۋ تۋرالى مىندەتتەمەگە قول قويۋى ءتيىس.