اتا- انالارىڭىزعا ايتۋعا بولمايتىن سوزدەر

***

جۇمىس بار ما؟ بولماسا تەلەفوندى قويدىم...

(باۋىر ەتى بالاسىن ساعىنىپ، داۋىسىڭدى ەستىپ قۋانىپ وتىرعان اتا- اناعا بۇل ءسوز قانشاما اۋىر تيەتىنىن بىلەسىڭ بە؟! ونىڭ تەلەفون تۇتقاسىن قويعاننان كەيىنگى كوڭىلى جاسىعان ءحالىن سەن ەشقاشان ويلاپ جەتە المايسىڭ عوي)

***

بولدى، بولدى. ۇقتىم، نەگە ايتا بەرەسىز...

(ساعان الاڭدايدى، جامان بولسىن دەمەيدى عوي ەشقاشان)

***

ايتقانىممەن ءبارىبىر تۇسىنبەيسىز. سۇراماي- اق قويىڭىزشى!

(بىلگىسى كەلگەن، جاڭا زامان اۋقىمىن تۇسىنبەگەن اتا- اناڭا سابىرلىقپەن تۇسىندىرسەڭ نەڭ كەتەر ەدى؟!)

***

بۇلاي ىستەمەڭىز دەپ قانشا رەت ايتتىم. ءبارىبىر قاتىرمايسىز.

(شاماسى جەتپەگەن، قولىنان كەلمەگەن ىستەردى ىستەۋگە تالپىنعاندا ولاردى ايالايمىن دەپ بۇلاي ايتۋ - جارامسىزسىڭ، قولىڭنان تۇك كەلمەيدى دەيتىندەي اسەر بەرەتىنىن ۇمىتپاعان ءجون)

***

وي، بۇل ەسكىلىك قوي. قازىر قاي زامان.

(جاڭا زاماننىڭ ۇرپاعىسىڭ. ولاردىڭ اقىلى قاجەتىڭە جاراماعان كۇندە دە بۇلاي تويتارىس بەرۋ اتا- اناڭا وبال جاساعاندىق ەمەس پە؟!)

***

بولمەمدى جيناستىرماي- اق قويىڭىز. مىنە، ىزدەگەن نارسەمدى تابا الماي دال بولىپ وتىرمىن!

(بىردە اناما وسىلاي ايتىپ ەم، ءۇنسىز عانا شىعىپ كەتكەن بەيشارا انامنىڭ كوز جاسىن سىعىمداپ بارا جاتقانىن بايقاپ قالدىم...)

***

«مىنانى جە، انانى جە» دەۋدىڭ نە كەرەگى بار. نەگە تابەتىم تارتادى ءوزىم بىلەم عوي.

(ءدال وسى ءسوزدىڭ ءوز بالاڭ ومىرگە كەلىپ، ەرجەتە باستاعاندا اس مەزگىلىندە كۇن سايىن ايتاتىن بولاسىڭ. ءومىر الما- كەزەك، باۋىرىم!)

***

ءوز تالعامىم بار، زارلاي بەرمەڭىزشى!

(وسىنشاما اۋىر سوزدەن كەيىنگى اناڭنىڭ ءۇنسىز قالعانىن، وقىس ورناي قالعان تىنىشتىقتى ەلەستەتىپ كورشى. سول ءبىر ءسات ءوزىڭدى عۇمىر بويى مازالايتىن بولادى ءالى)

***

قاجەتسىز نارسەلەردى قوقسىتىپ، جيناي بەرىپ نە قىلاسىز! قوقىسقا تاستاي سالىڭىزشى!

(اتا- اناڭنىڭ ەستەلىك ءۇشىن ساعان قاتىستى نارسەلەردى جيناپ قويعانى كىنا ەمەس قوي. ولار ومىردەن وتكەن سوڭ ءوزىڭ ايتقان «قاجەتسىز نارسەلەر» كوز الدىڭدا تۇرسا، ءدال وسى ءسوزىڭ ەسىڭە ورالاتىن بولادى)

اتا- انا جانىڭدا جۇرگەن باقىتىڭ، جۇرەگىڭدەگى ەڭ تازا، ءمولدىر اسىلىڭ. كىرلەتىپ الۋدان اباي بولعايسىڭ!