ماكسيم روجين: قۇرىلتايدىڭ ۇلىتاۋدا ءوتۋى - يدەولوگيالىق تۇرعىدان وتە دۇرىس شەشىم

نۇر-سۇلتان. قازاقپارات - قۇرىلتاي مۇشەسى ماكسيم روجين بۇگىن ۇلىتاۋدا وتەتىن العاشقى ۇلتتىق قۇرىلتايدا تالقىلانۋى مۇمكىن ماسەلەلەر تۋرالى ايتتى، دەپ حابارلايدى قازاقپارات ءتىلشىسى.

«العاشقى قۇرىلتايدىڭ ۇلىتاۋدا ءوتۋى - يدەولوگيالىق تۇرعىدان وتە دۇرىس شەشىم. ەلدىڭ بىرىگۋىنە، حالىقتىڭ ىنتىماعىن دامىتۋعا باعىتتالعان قۇرىلتاي بولعاننان كەيىن، ەرتەڭگى جيىندا سول باعىتتاعى يدەيالار ايتىلادى دەپ ويلايمىن. بۇل تالقىلاۋ پلاتفورماسىنىڭ كوپ وزگەشەلىگى بار. بۇرىن ۇلتتىق قوعامدىق سەنىم كەڭەسىندە الماتىدان كەلەتىن مۇشەلەرى از بولاتىن. ال قازىر قۇرىلتايدا 117 ادام بار. ونىڭ ىشىندە ءار اۋماقتىڭ ازاماتى بار. ولاردىڭ بارلىعى جەرگىلىكتى جەرلەردەگى ماسەلەلەردى بىلەتىن ادامدار. سونىمەن قاتار، قۇرىلتايدا ايتىلاتىن ويلار، پىكىرلەر مەن ۋاجدەرگە ورتالىق اتقارۋشى بيلىك نازار اۋدارىپ، ءتيىستى شارا قابىلدايتىن بولادى. قۇرىلتاي كەمىندە جىلىنا ءبىر رەت ءوتۋى كەرەك. دەگەنمەن اي سايىن جۇرگىزىلەتىن ماڭىزدى جۇمىستار بار. جالپى بۇل جەرگىلىكتى جەرلەردەگى تۇيتكىلدى ماسەلەلەردى تالقىلايتىن ورىن بولادى دەپ سەنەمىن. بۇدان بولەك، قازىر قوعامدى ءبولىپ جارعان كەلىسپەۋشىلىكتەر جيىلەپ تۇر. سونى شەشۋ - وسى ورگاننىڭ مىندەتى رەتىندە بەكىتىلدى»، - دەدى ۇلتتىق قۇرىلتايدىڭ مۇشەسى.

ماكسيم روجيننىڭ ايتۋىنشا، ۇلتتىق قۇرىلتاي مۇشەلەرىن ق ر پرەزيدەنت اكىمشىلىگى جاساقتاعان. سونداي-اق، ول قۇرىلتاي قۇرامىنداعى ماماندارعا جالاقى نەمەسە وزگە دە تولەمدەر بەرىلمەيتىنىن ايتتى.

ەسكە سالا كەتەيىك، بۇگىن مەملەكەت باسشىسىنىڭ جارلىعىمەن قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتاي قۇرىلدى.