تيك توك كرەاتيۆتى قازاقستاندىقتارعا قولداۋ كورسەتەدى

بۇل تۋرالى شىعىس ەۋروپا مەن ازياداعى TikTok PR- ديرەكتورى كريستينا ەرەمەيەۆا ءمالىم ەتتى، دەپ حابارلايدى قازاقپارات ءتىلشىسى.

كريستينا ەرەمەيەۆانىڭ دەرەگىنشە، بىلتىر شىعىس ەۋروپادا جاڭاشىل جاستاردى قولداۋعا ارنالعان قور اشىلعان. ول تانىمدىق جانە تىڭ سەرپىن بەرەتىن مازمۇنداعى كونتەنت اۆتورلارىنا سىياقى بەرەدى.

«ءبىز قازاقستانداعى كرەاتيۆتى جاستاردى قولدايمىز. بىزدە تالانتتاردى دامىتۋ باعدارلاماسى دا بار. جوبا اياسىندا اۆتورلارعا ساپالى كونتەنت جاساۋدى، سول ارقىلى اقشا تابۋدى ۇيرەتەمىز. قىزىقتى جانە ساپالى ۆيدەو تۇسىرەتىن جاستارعا الەمدىك برەندتەرمەن ىنتىماقتاستىق ورناتۋىنا كومەكتەسەمىز»، - دەدى TikTok PR- ديرەكتورى كريستينا ەرەمەيەۆا.

بۇعان دەيىن شىعىس ەۋروپاداعى TikTok وكىلدىگىنىڭ ديرەكتورى ولەگ سوكولوۆ سىرتقى ىستەر ءمينيسترىنىڭ ورىنباسارى الماس ايداروۆپەن كەزدەسۋ بارىسىندا قازاقستانمەن ىنتىماقتاستىقتى كەڭەيتۋگە نيەتتى ەكەنىن جەتكىزگەن ەدى. ال وتكەن جىلى پرەزيدەنت قازاقستان حالقى اسسامبلەياسى ۇسىنعان تاريحتى TikTok پلاتفورماسى ارقىلى دارىپتەۋ ۇسىنىسىن قولداعان بولاتىن. تاياۋدا سيفرلىق دامۋ ءمينيسترى باعدات مۋسين TikTok پەن YouTube كورەتىندەر ءۇشىن ءتاريفتى كوتەرۋدى ۇسىندى. بۇگىنگى تاڭدا TikTok پلاتفورماسىنا 7 ميلليوننان استام قازاقستاندىق قوسىلعان.