ەلوردادا وسپان باتىرعا ارنالعان عىلىمي جيىن ءوتتى

نۇر-سۇلتان. قازاقپارات - بۇگىن ەلورداداعى ۇلتتىق اكادەميالىق كىتاپحانادا «الاش رۋحى جانە وسپان باتىر يسلام ۇلى» اتتى حالىقارالىق عىلىمي-پراكتيكالىق كونفەرەنسيا ءوتتى.

يگى ءىستى قازاق كوشى مەن مەملەكەتتىك رامىزدەردىڭ 30 جىلدىعىنا وراي گەرالديكالىق زەرتتەۋلەر ورتالىعى اكادەميالىق كىتاپحانامەن بىرلەسىپ ۇيىمداستىردى.

قازاق حاندارىنان جالعاسقان ەل مەن جەرگە دەگەن شەكسىز ادالدىق الاششىلدار ارقىلى جەر بەتىندەگى بارشا قازاقتىڭ قانىنا جول تارتتى. ءور التاي كۇرەسى دە الاششىل رۋحتىڭ اسقاق مارتەبەسىندەي تاريح بەتىنە التىن ارىپتەرمەن قالدى. سولاردىڭ ءبىرى دە بىرەگەيى، شىڭجاڭداعى تۇركى حالىقتارىنىڭ ۇل-ازاتتىق قوزعالىسى كوشباسشىلارىنىڭ ءبىرى - وسپان يسلام ۇلى.

وسپان باتىر - قازاقتىڭ ۇلى ادامدارىنىڭ ءبىرى. ۇلتتىڭ ارى ءۇشىن جانتالاسقان باتىرىمىز. ونىڭ تاريحىن زەرتتەۋشىلەر كوپ. الايدا بارلىعى شىندىققا جاناسادى دەپ ايتۋعا كەلمەيدى. ۇلى دالانىڭ الىپ ارىستاندارىنىڭ ءبىرى وسپان اتامىز تۋرالى ۇرپاقتارىمىز ءبىلۋى قاجەت. ونىڭ بەينەسىن جاساۋ - بارشامىزعا سىن، - دەپ اتاپ ءوتتى شىڭعىسحان اكادەمياسىنىڭ اكادەميگى سارتقوجا قارجاۋباي ۇلى.

وسپان باتىر تۋرالى العاشقى دوكتورلىق جۇمىسىمدى جازۋ ماعان ءناسىپ بولدى. جۇمىسىمدى جازۋ بارىسىندا وسپان باتىردىڭ ءىرى تۇلعا ەكەنىنە كوز جەتكىزدىم. نۇر-سۇلتان شاھارىندا وسپان باتىرعا ارناپ وسىنداي عىلىمي كونفەرەنسيانىڭ ءوتىپ جاتقانىنا قۋانىشتىمىن. وسپان باتىردىڭ ءومىر جولىن جازۋدا ۇلكەن ءىس اتقاردىم دەپ ويلايمىن. بۇل وتىرىستان سوڭ ودان دا ۇلكەن جۇمىستار ىستەيتىنىمىزگە سەنىمدىمىن، - دەدى تۇركيادان ارنايى كەلگەن تاريحشى، عالىم ومەر كۋل.

حالىقارالىق كونفەرەنسيا قازاق كوشىنىڭ 30 جىلدىعىنا وراي ۇلت باتىرىن ۇلىقتاۋدى ماقسات تۇتىپ وتىر. ⅩⅩ عاسىردا الەم نازارىن اۋدارتقان ۇلى تۇلعالاردىڭ ءبىرى، تەك قازاق زەرتتەۋشىلەرى ەمەس، شەتەلدىك عالىمداردىڭ دا زەرتتەۋلەرىندە كۇرەسكەرلىك داڭقى تۋرالى قانشاما داستان ومىرگە كەلگەن وسپان باتىر يسلام ۇلى ەرلىگىن بۇگىنگى قوعامعا ۇلگى ەتكىمىز كەلدى دەيدى ۇيىمداستىرۋشىلار. سونداي-اق قيىر شەتتەگى قازاق تاريحىن جۇيەلى زەرتتەۋگە جول اشۋدى دىتتەگەن.

القالى جيىنعا مەملەكەت تاريحى ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور، اكادەميك ەركىن ءابىل، شىڭعىسحان اكادەمياسىنىڭ اكادەميگى سارتقوجا قارجاۋباي ۇلى سىندى كورنەكتى عالىمدارمەن قاتار، تۇركيا ەلىنەن تاريحشى، عالىم ومەر كۋل، جازۋشى ءجادي شاكەن ۇلى، جۋرناليستەر مەن زيالى قاۋىم وكىلدەرى قاتىستى.

baq.kz