ءومىرزاق شوكەيەۆ ياساۋي كەسەنەسىنىڭ ءبۇلىنىپ جاتقانى تۋرالى اقپاراتقا تۇسىنىكتەمە بەردى

تۇركىستان. قازاقپارات - كوگالداندىرۋدان كەسەنەگە كەلەر قاۋىپ جوق. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە تۇركىستان وبلىسىنىڭ اكىمى ءومىرزاق شوكەيەۆ ايتىپ ءوتتى، دەپ حابارلايدى قازاقپارات ءتىلشىسى.

ق. ا. ياساۋي كەسەنەسىنە قاتىستى الەۋمەتتىك جەلىدە قىزۋ تالقىلانىپ جاتقان ماسەلەگە وبلىس اكىمى پىكىر ءبىلدىردى.

«مۇنداي پىكىرلەر ايتىلىپ تۇرادى. كەسەنە اۋماعىنداعى 88 گەكتار جەرگە ەشقانداي عيمارات سالىنبايدى. تەك كوگالداندىرۋ جۇمىستارى جۇرگىزىلدى. قازىرگى كوگالداندىرىلعان جەردە بۇرىندا ءارتۇرلى گۇلدەر مەن تالدار ەگىلگەن بولاتىن. ءبىز سول جەرگە گازون ەكتىك. ارتىنداعى توپىراعى شىعىپ جاتقان جەردى بوتانيكالىق باق جاسادىق. بۇل يۋنەسكونىڭ قاراماعىنداعى كەسەنە. سوندىقتان بارلىق جوبالار سولارمەن كەلىسىلىپ جاسالادى»، - دەدى ءو. شوكەيەۆ.

سونداي- اق وبلىس اكىمى تۇركىستانعا كەلەتىن تۋريستەرگە دە جاعداي جاسالۋ كەرەكتىگىن جەتكىزدى.

«بىزدە عالىمدارمەن اقىلاسىپ جاسايمىز. ەشقانداي زيان كەلىپ جاتقان جوق. كەيبىر ادامدار ۇيىندە جاتىپ، پىكىر ايتادى. دالەلىن ايتسىن، سوعان ساي سويلەسەتىن بولامىز»- دەدى ءو. شوكەيەۆ.

بۇدان بۇرىن، 600 جىلدان استام تاريحى بار نىساننىڭ كەي قابىرعالارى سۋلانا باستاعانى تۋرالى ايتىلعان ەدى.