«ايبوز» تۇڭعىش ۇلتتىق ادەبي سىيلىعىنا ءوتىنىم قابىلداۋ باستالدى

None
None
نۇر- سۇلتان. قازاقپارات – ق ر مادەنيەت جانە سپورت مينيسترلىگى «ايبوز» تۇڭعىش ۇلتتىق ادەبي سىيلىعىنا بايقاۋ جاريالادى.

ادەبي سىيلىقتىڭ تۇساۋكەسەرى بۇگىن زيالى قاۋىم وكىلدەرىنىڭ، اقىن- جازۋشىلاردىڭ قاتىسۋىمەن ءوتتى، دەپ حابارلايدى قازاقپارات ءتىلشىسى. ق ر مادەنيەت جانە سپورت ءمينيسترى داۋرەن ابايەۆتىڭ اتاپ وتۋىنشە، «ۇزدىك پروزا»، «ۇزدىك پوەزيا»، «ۇزدىك دراما»، «ۇزدىك كوركەم اۋدارما»، «ۇزدىك بالالار ادەبيەتى»، «ۇزدىك كوميكس» جانە «كىتاپتىڭ ۇزدىك ديزاينى» نوميناتسيالارى بويىنشا جەڭىمپاز اتانعاندار 5 ميلليون تەڭگەدەن اقشالاي سىيلىق الادى. كونكۋرس ناتيجەسىنەن سوڭ ولاردىڭ ەڭبەكتەرى 500 دانامەن جارىق كورەدى. سونىمەن قاتار ول بۇل جوبانىڭ مىندەتى ادەبيەتشىلەردى قولداۋ عانا ەمەس، سونىمەن قاتار جازۋشىلىق ونەردىڭ ايرىقشا الەۋمەتتىك ماڭىزدىلىعىن قوعامعا كورسەتۋ ەكەنىن اتاپ ءوتتى.

«باستى ماقساتىمىز - ءتول ادەبيەتىمىزدى تىڭ دۇنيەلەرمەن تولىقتىرىپ، ونى جاڭاشا بيىككە كوتەرۋ، سونداي- اق ۇلتىمىزدىڭ ادەبي مۇراسىن مولايتىپ، وتاندىق ادەبيەتكە جاڭا سەرپىن بەرۋ. بۇل سىيلىقتىڭ تاعى ءبىر ەرەكشەلىگى - ۇزدىك دەپ تانىلعان شىعارمالار باسىپ شىعارىلىپ، كىتاپحانالارعا تاراتىلادى. قاتىسۋشىلاردىڭ جاسىنا، ەڭبەك جانرىنا، جازۋ تىلىنە شەكتەۋ جوق. ەڭ باستىسى - شىعارما مازمۇندى، وزەكتى بولۋعا ءتيىس. قىسقا بولعانىمەن ەلدىڭ ەسىندە قالىپ، جۇرتشىلىقتىڭ اۋزىنان تۇسپەيتىندەي تۋىندى جازسا، بايگە سوعان بۇيىرادى. بۇل - وتاندىق كىتاپ شىعارۋ ءىسى مەن ادەبيەتتى قولداۋ باعىتىندا جۇزەگە اسىرىپ جاتقان ءىس- شارالاردىڭ ءبىرى عانا. ەل پرەزيدەنتى بەلگىلەپ بەرگەندەي، ءبىزدىڭ تۇپكى ماقساتىمىز - وقيتىن ۇلت قالىپتاستىرۋ. ول ءۇشىن ءبىز «جاڭا قازاق ادەبيەتى» سەرياسىن قوسا العاندا، جاس اۆتورلاردى قولداۋدىڭ جاڭاشىل تەتىكتەرىن قۇرىپ، مەملەكەتتىك سۋبسيديالاۋ كولەمىن ۇلعايتىپ جاتىرمىز. گرانتتار مەن سىيلىقتار جاريالاپ، كىتاپ جارمەڭكەلەرىن وتكىزىپ كەلەمىز. بولاشاقتا پروزا، پوەزيا جانە دراماتۋرگياداعى ەڭ مىقتى جاس تالانتتاردى قولداۋ جانە تابيعي قابىلەتىن شىڭداۋعا ارنالعان «ادەبي زەرتحانا» اشۋدى جوسپارلاپ وتىرمىز»، - دەدى داۋرەن ابايەۆ.

ايتا كەتەيىك، بايقاۋعا وتاندىق جازۋشىلار قاتىسا الادى. وتىنىمدەردى مىنا ەلەكتروندى مەكەنجايعا 2022 -جىلعى 15-ماۋسىمنان 1-قازانعا دەيىن جىبەرۋ قاجەت: [email protected]. ادەبي سىيلىق جىل سوڭىندا تاپسىرىلادى.

اۆتور: مارلان جيەمباي


سوڭعى جاڭالىقتار
telegram