بىرنەشە ءتىلدى ەركىن ءبىلۋ بۇگىنگى ءومىر تالابى - ۆلاديمير شنايدەر

مۇنداي پىكىردى «تۇران- استانا» ۋنيۆەرسيتەتىنىڭ كافەدرا مەڭگەرۋشىسى ۆلاديمير شنايدەر ءبىلدىردى، دەپ حابارلايدى قازاقپارات ءتىلشىسى.

«قازاق عاسىرلار قويناۋىنان ۇنەمى «قوي ۇستىنە بوزتورعاي جۇمىرتقالاعان» زاماندى اڭساعان، جۇرتى ءۇشىن «جەرۇيىقتى ىزدەگەن» حالىق. بۇگىنگى قازاقستان حالىق ارمان ەتكەن جەرۇيىقتىڭ بەسىگى مەن كىندىگىنە اينالۋى ءتيىس. ول - اتا- بابا ارمانى، كەيىنگى ۇرپاققا اماناتى. ال بىزدەر مەن سىزدەردىڭ مىندەتىمىز وسى جولداعى پرەزيدەنتىمىزدىڭ باستامالارىنا قولداۋ جاساپ، ءاربىرىمىز قازاق ەلىن دوستىق پەن بىرلىكتىڭ بەيبىتشىلىكتىڭ تىرەگى مەن ۇلتارالىق كەلىسىمنىڭ بەسىگىنە اينالدىرۋ جولىندا بارىنشا ەڭبەك ەتىپ ۇلەسىمىزدى قوسۋ بولسا كەرەك»، - دەدى ۆلاديمير شنايدەر نۇر- سۇلتان قالالىق قازاقستان حالقى اسسامبلەياسىنىڭ ⅩⅩسەسسياسىندا.

سونىمەن قاتار ول ءبىر ءتىلدى عانا مەڭگەرىپ قويماي، بىرنەشە ءتىلدى ەركىن ءبىلۋ بۇگىنگى ءومىر تالابى ەكەندىگىن باسا ايتتى.

«وسى قاعيدانى ۇستانا وتىرىپ، بولاشاق ۇرپاقتى قازاق تىلىندە سويلەۋگە، كۇندەلىكتى ومىردە قازاق ءتىلىن قولدانۋعا شاقىرۋ دا سىزدەر مەن بىزدەردىڭ باستى مىندەتىمىزدىڭ ءبىرى ەكەنىن كۇن تارتىبىنەن شىعارۋعا بولمايتىنىن ايتقىم كەلەدى. سوناۋ ⅩⅨ عاسىردا قازاق مادەنيەتى مەن ءتىلىن زەرتتەگەن ەۋروپا عالىمدارى تۇركى تانۋشىلار ۆ. رادلوۆ، پ. مەليورانسكيلەر «تۇركى تىلدەرىنىڭ ىشىندە ەڭ تازا ءتىل - قازاق ءتىلى» ەكەنىن، ال قازاق ءتىلى ءبىلىمىنىڭ نەگىزىن قالاۋشى ا. بايتۇرسىنوۆ «تۇركى ءتىلىن ⅩⅩ عاسىرعا دەيىن ازدىرماي، قاز قالپىندا ساقتاپ كەلگەن العىس پەن ابىروي قازاققا ءتيىس» دەپ اسا قۇندى باعا بەرگەن قازاق ءتىلى قازاقستاندىقتاردىڭ ورتاق ءتىلى بولۋى ءتيىس. جاستارىمىزدىڭ بويىنا قازاق ءتىلىنىڭ قىر- سىرىن، بايلىعى مەن ەڭ اسىلدارىن ءسىڭىرۋ ارقىلى ءبىز وسكەلەڭ ۇرپاقتىڭ بىرەگەيلىگىن قالىپتاستىرا الامىز»، - دەدى ۆلاديمير شنايدەر.