ەلوردادا ءبىرقاتار كوشە تانىمال تۇلعالاردىڭ ەسىمىمەن اتالادى

نۇر- سۇلتان. قازاقپارات - نۇر- سۇلتان قالاسىنداعى بىرنەشە كوشە جانە ساياباققا تانىمال تۇلعالاردىڭ ەسىمىن بەرۋ ماسەلەسى قالالىق ءماسليحات وتىرىسىندا قارالدى، دەپ حابارلايدى قازاقپارات ءتىلشىسى.

«2022 -جىلعى 28-ساۋىردە وتكەن قالالىق ونوماستيكا كوميسسياسىنىڭ وتىرىسىندا ەلوردادا ءبىرقاتار كوشە مەن ساياباققا اتاۋ بەرۋ ماسەلەسى قارالدى. ونىڭ ىشىندە الماتى اۋدانىنداعى ا №24 كوشەگە ورال مۇحامەدجانوۆتىڭ ەسىمىن بەرۋ، ا №40 كوشەگە نۇرلان بالعىمبايەۆتىڭ اتىن بەرۋ، ا №62 كوشەگە سافۋان شايمەردەنوۆتىڭ ەسىمىن بەرۋ قاراستىرىلىپ وتىر. سول سياقتى ابىلاي حان داڭعىلىنداعى دينا نۇرپەيسوۆانىڭ ەسكەرتكىشى ورنالاسقان ساياباققا «قازاق ەلىنىڭ كۇيشىلەرى مەن كۇيشى- كومپوزيتورلارىنىڭ» اللەياسى دەگەن اتاۋ بەرۋ ۇسىنىلادى»، - دەدى نۇر- سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ءماسليحات وتىرىسىندا جاساعان بايانداماسىندا.

سونداي- اق ەسىل اۋدانى بويىنشا №202 كوشەگە نۇركەن ءابدىروۆتىڭ، ە №101 كوشەگە ولجاباي باتىردىڭ، ە №111 كوشەگە شەرحان مۇرتازانىڭ، ە №324 كوشەگە دۇكەنباي دوسجاننىڭ، ە №325 كوشەگە ەركەعالي راحماديەۆتىڭ، ە №357 كوشەگە الەكساندار سىزعانوۆتىڭ، ە №486 كوشەگە ەركىن اۋەلبەكوۆتىڭ، ە №576 كوشەگە قاناي ءبيدىڭ، ە №577 كوشەگە حامزا ەسەنجانوۆتىڭ، ە №578 كوشەگە بوپاي حانىمنىڭ، ە №579 كوشەگە قايرەدەن قاربايەۆتىڭ، ە №580 كوشەگە سابىر نيازبەكوۆتىڭ، ە №582 كوشەگە بەرتىس ءبيدىڭ، ە №607 كوشەگە قۇرمان تاستانبەكوۆتىڭ، ە №608 كوشەگە شولپان جانداربەكوۆانىڭ، ە №757 كوشەگە اقسەلەۋ سەيدىمبەكتىڭ، ە №758 كوشەگە ب ا ءا- ءنىڭ بۇرىنعى پرەزيدەنتى شەيح حاليفا بەن زايد ءال- ناحاياننىڭ، ە №889 كوشەگە بارلىبەك سىرتتان ۇلىنىڭ، ە №890 كوشەگە ەرمۇقان بەكماحانوۆتىڭ، ە №898 كوشەگە تۇرسىنبەك كاكىشيەۆتىڭ ەسىمىن بەرۋ ۇسىنىلدى.

بۇعان دەيىن حابارلاعانىمىزداي قالاداعى ءبىرقاتار ءبىلىم بەرۋ وشاعىنا ەلىمىزگە تانىمال تۇلعالاردىڭ ەسىمىن بەرۋ ۇسىنىلعان ەدى. سونداي- اق شاعىن ساياباقتى ۇلى بريتانيا پاتشايىمى II ەليزاۆەتانىڭ ەسىمىمەن اتاۋ ۇسىنىسى جاسالدى.