قازاقستاندىق اۋىر اتلەت جاس وسپىرىمدەر اراسىندا الەم چەمپيونى اتاندى

نۇر-سۇلتان. قازاقپارات - قازاقستاندىق ەراسىل ساۋلەبەكوۆ جاس وسپىرىمدەر اراسىندا مەكسيكانىڭ لەون قالاسىندا اۋىر اتلەتيكادان ءوتىپ جاتقان الەم چەمپيوناتىندا جەڭىمپاز اتاندى، دەپ حابارلايدى قازاقپارات ءتىلشىسى.

قازاقستان اۋىر اتلەتيكا فەدەراتسياسىنان ءمالىم ەتكەندەي، ەراسىل 67 كەلىگە دەيىنگى سالماقتا ۇزدىك شىقتى.

قازاقستاندىق سپورتشى قوسسايىس قورىتىندىسىندا 281 كەلىنى (123+158) باعىندىردى.

تۇركيالىق الااددين ساين 278 كەلىمەن (121+157) ەكىنشى، پولياك بارتوش بۋرسكي 269 كەلىمەن (116+153) ءۇشىنشى ورىنعا كوتەرىلدى.

تاعى ءبىر قازاقستاندىق داريا بالابايۋك 49 كەلىگە دەيىنگى سالماقتا جۇلقا كوتەرۋدەن قولا مەدالعا قول جەتكىزدى.

دەگەنمەن ول قوسسايىس قورىتىندىسىندا 152 كەلىمەن (69+83) ءتورتىنشى ورىنعا تابان تىرەدى.

ەسكە سالا كەتەيىك، بۇدان بۇرىن اۋىر اتلەتيكادان الەم چەمپيوناتىندا قازاقستان قورجىنىنا تاعى ءبىر مەدال تۇسكەنىن جازعان بولاتىنبىز.