اۋەجاي مەن مەشىتتەرگە ادامنىڭ ءتۇر-الپەتىن تانيتىن بەينەكامەرالار قويىلعان
بۇل تۋرالى نۇر-سۇلتان قالاسى پوليتسيا دەپارتامەنتى جەدەل باسقارۋ ورتالىعىنىڭ ءبولىم باسشىسى لاريسا چيرۆا ءمالىم ەتتى، دەپ حابارلايدى قازاقپارات ءتىلشىسى.
«ءبىز بۇل جوبانى جاپپاي ەنگىزۋدى ءبىراز ۋاقىتتان بەرى جوسپارلاپ كەلەمىز. قازىر كەلبەتتى تانيتىن بەينەباقىلاۋ كامەرالارى پيلوتتىق نەگىزدە اۋەجاي، ۆوكزال، جەراستى وتكەلدەرىنە جانە مەشىتتەرگە قويىلدى. دەگەنمەن ول بارلىق جەردە دۇرىس جۇمىس ىستەپ تۇرعان جوق. باعدارلاما جەتىلدىرۋدى تالاپ ەتەدى»، - دەدى جەدەل باسقارۋ ورتالىعىنىڭ ءبولىم باسشىسى.
لاريسا چيرۆانىڭ مالىمەتىنشە، كامەرالار ادامنىڭ كەلبەتىن تانىپ، ازامات تۋرالى بازادا بار بارلىق اقپاراتتى كورسەتەدى. قۇرىلعى حالىقارالىق نەمەسە ەل ىشىندە ىزدەۋ سالىنعان كۇدىكتىلەردى دە انىقتاۋعا قاۋقارلى. جوبا پيلوتتىق كەزەڭنەن وتكەننەن سوڭ ونى تولىق قولدانىسقا ەنگىزۋ جوسپارلانعان.
