«مەن قازاق ءتىلىن تاڭدايمىن»: ياكۋتيالىق ستۋدەنت قازاقستانداعى ءومىرى تۋرالى ايتىپ بەردى

None
None
نۇر-سۇلتان. قازاقپارات - ونىڭ ايتۋىنشا، كوپشىلىك ونى قازاق دەپ قابىلدايدى.

بانككە، بانكوماتقا، تەرمينالعا بارسام دا قازاق ءتىلىن تاڭدايمىن. ياكۋتيادان كەلگەن ستۋدەنت قازاق ءتىلىن قالاي ۇيرەنگەنىن جانە قازاقتارعا دەگەن كوزقاراسىن ايتىپ بەردى، دەپ حابارلايدى Almaty.tv.

«مەنىڭ اتىم داياانا. جاسىم 22-دە. الماتىداعى Suleyman Demirel University-نىڭ 4-كۋرسىن ءتامامداپ جاتىرمىن. قازاق وتە قوناقجاي، ادامگەرشىلىگى مول حالىق. ايتايىن دەگەنىم، قازاق ءتىلى ماعان العاشىندا ءان سياقتى ەستىلدى، ياعني تۇسىنىكسىز كورىندى، ءبىراق تۇركى ءتىلى ەكەنىن بىردەن سەزىندىم. مەن ياكۋت ءتىلىن جاقسى مەڭگەرگەندىكتەن ءارى ماماندىعىم تىلگە بايلانىستى بولعاندىقتان، ءبىزدىڭ سوزدەر ۇقساس ەكەنىن بىردەن ءتۇسىندىم»، - دەدى ستۋدەنت.

ونىڭ ايتۋىنشا، كوپشىلىك ونى قازاق دەپ قابىلدايدى.

«ءبىرىنشى كۋرستان باستاپ ءبارى مەنەن «سەن قازاقسىڭ با؟» دەپ سۇرايدى. ءتىلدى ءبىلۋ، ونى ساقتاۋ وتە ماڭىزدى دەپ ويلايمىن. بانككە، بانكوماتقا، تەرمينالعا بارسام دا قازاق ءتىلىن تاڭدايمىن. نەعۇرلىم كوپ ادام تاڭداسا، جاساندى ينتەللەكت بۇل ءتىلدى تانىمال دەپ سانايدى جانە ونى ودان ءارى دامىتادى. ال ياكۋتسكىدە ياكۋت تىلىندە سويلەۋگە تىرىسامىن»، - دەيدى ول.

سونداي-اق داياانا قازاق تىلىندەگى «امانات» ءسوزىنىڭ وزىنە قالاي اسەر ەتكەنىن ايتىپ بەردى.

«امانات - ءتىلىمىز، مادەنيەتىمىز، جەرىمىز. قازاقستانعا كەلگەن ءاربىر ياكۋت - امانات. ياكۋتياداعى ءاربىر قازاق - بىزگە امانات، ونى امان-ەسەن تۋعان ەلىنە قايتارۋ ءبىزدىڭ پارىزىمىز. بۇل وتە كەرەمەت ءسوز جانە ونىڭ كەرەمەت ماعىناسى بار»، - دەپ اتاپ ءوتتى داياانا.

ءسوز سوڭىندا ول قازاق ءتىلىن قالاي ۇيرەنگەنىن ايتتى.

«مەن قازاق ءتىلىن وقۋلىقتان ۇيرەنبەدىم. ۇنەمى مۋزىكا تىڭداپ، ساتۋشىلارمەن، تاكسي جۇرگىزۋشىلەرىمەن سويلەسۋ ارقىلى ۇيرەنگەن بولاتىنمىن. مەن قازاق ءتىلىن ۇيرەنىپ، دەڭگەيىمدى جەتىلدىرگىم كەلەدى»، - دەدى ول.

تولىعىراق YouTube جەلىسىنەن كورە الاسىزدار.


سوڭعى جاڭالىقتار