ءۇندىستاندىق ساياساتكەرلەردىڭ پايعامبار تۋرالى ءسوزى ءىرى جانجالعا تۇرتكى بولدى
پارتيا وكىلدەرى تىكەلەي ەفير كەزىندەگى پىكىرىتالاس بارىسىندا مۇحاممەد پايعامبارعا ءتىل تيگىزگەن.
ساراپشىلار بۇل جەرگىلىكتى ەكونوميكاعا كەرى اسەر ەتۋى مۇمكىن ەكەنىن ايتادى. ويتكەنى يران، پاكىستان، بانگلادەش جانە وزگە دە بىرنەشە مەملەكەت ءۇندىستان تاۋارىنان باس تارتىپ جاتىر. ال الەمنىڭ بىرنەشە ەلىندە ەرەۋىلدەر باسىلار ەمەس. ىلە- شالا ەل بيلىگى ساياساتكەرلەردى جۇمىستان دا، پارتيادان دا شىعارىپ جىبەردى. ال يران، كاتار، كۋۆەيت بيلىگى ءۇندىستان ەلشىسىن شاقىرىپ، نارازىلىق نوتاسىن ءبىلدىردى.
ءۇندىستاننىڭ سىرتقى ىستەر ءمينيسترى پارتيا وكىلىنىڭ اڭداماي ايتقان پىكىرى مەملەكەتتىڭ ۇستانىمىنا ساي ەمەس ەكەنىن جاريالاپ، اقتالعانداي بولدى. الايدا ەرەۋىلدەردىڭ باسىلاتىن ءتۇرى جوق. اشىنعان جۇرت ساياساتكەرلەر قاماۋعا الىنىپ، ولار ءۇشىن پرەمەر- مينيستر كەشىرىم سۇراسىن دەپ وتىر.
