الماتىدا رۇقساتسىز وتكەن ميتينگتەن ءبىر ادام قازا تاپتى، ءبىر ادام قاماۋدا

الماتى. قازاقپارات - الماتىداعى رۇقسات ەتىلمەگەن ميتينگ قايعىلى جاعدايمەن اياقتالدى. جولدىڭ جابىلعانىنا نارازى بولعان ەر ادام توبەلەس كەزىندە قازا تاپتى، دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ مالىمەتىنشە، 11- ماۋسىمدا ءبىر توپ ازامات گاگارين كوشەسىنىڭ كولىك جۇرەتىن بولىگىن جاۋىپ تاستاعان.

«رۇقسات ەتىلمەگەن اكسياعا قاتىسۋشىلاردىڭ ءبىرى - 1980 -جىلى تۋعان م. ەسىمدى ازامات. جانجال كەزىندە قوزعالىسى بوگەلگەن كولىكتەردىڭ ءبىرىنىڭ جۇرگىزۋشىسى 1974 -جىلى تۋعان ك. ەسىمدى ازامات جاراقاتتانعان. جابىرلەنۋشى قايتىس بولدى»، - دەپ حابارلادى دەپارتامەنتتەن.

ۆەدومستۆو تاراتقان اقپاراتقا سايكەس، 42 جاستاعى م. ەسىمدى ازاماتتىڭ ءىس- ارەكەتى ق ر ق ك- ءنىڭ 106-بابى 3-بولىگى «ابايسىزدا ولىمگە اكەپ سوققان دەنساۋلىققا قاساقانا اۋىر زيان كەلتىرۋ» بويىنشا قارالىپ جاتىر.

«ول ۋاقىتشا ۇستاۋ يزولياتورىنا قامالدى، سوتقا دەيىنگى تەرگەۋ باستالدى. كۇدىكتى 8 جىلدان 12 جىلعا دەيىن باس بوستاندىعىنان ايىرىلۋى مۇمكىن»، - دەپ اتاپ ءوتتى الماتى قالالىق پوليتسيا دەپارتامەنتىنىڭ باسپا ءسوز قىزمەتىنەن.

رۇقسات ەتىلمەگەن اكسيانى كورولەنكو كوشەسىندەگى ۇيلەردىڭ ءبىرىنىڭ تۇرعىندارى ۇيىمداستىرعانى انىقتالدى. ولار «2019 -جىلدان بەرى جاڭا تۇرعىن ءۇي كەشەنىنىڭ قۇرىلىسىنا بايلانىستى كولىكتەر كوبەيىپ كەتتى» دەگەندى جەلەۋ ەتىپ، اۋلالارىن جول جيەگىنەن قورشاۋدى تالاپ ەتكەن.

«بۇعان دەيىن بۇل ءۇي تۇرعىندارىنىڭ ءوتىنىشى بويىنشا جولدىڭ ءتورت جەرىندە جىلدامدىقتى شەكتەيتىن كەدەرگىلەر توسەلىپ، گاگارين جانە رادوستوۆتسا كوشەلەرىنە ەكى شلاگباۋم ورناتىلعان بولاتىن. باسقا ءمان- جايلار انىقتالىپ جاتىر»، - دەپ قوستى پوليتسياداعىلار.

اۆتور: الما مۇقانوۆا