الماتى اكىمدىگى تۇرعىن ءۇيدى باسقارۋدىڭ جاڭا نىسانىنا كوشۋ ءتارتىبىن ءتۇسىندىردى
وسى رەتتە ولار Facebook پاراقشاسىنداعى ارنايى چاتتا ساۋال قويدى، دەپ حابارلايدى قازاقپارات ءتىلشىسى.
Natalya Zheldak اتتى جەلى قولدانۋشىسىنىڭ جازۋىنشا، تۇرعىندار ۇيلەرىن مۇلىك يەلەرى بىرلەستىگى (م ي ب) نەمەسە جەكە سەرىكتەستىككە (ج س) اۋىستىرۋ ماسەلەسى بويىنشا جينالىس وتكىزبەكشى بولعان. ءبىراق، جينالىسقا تۇرعىنداردىڭ كوبى كەلمەگەن. ال الماتىدا 1- شىلدەگە دەيىن بارلىق تۇرعىن ءۇي م ي ب نەمەسە ج س- قا اۋىسۋى ءتيىس. اتالعان ماسەلە بويىنشا قازاقپارات ءتىلشىسى اكىمدىككە ساۋال جولداعان ەدى.
الماتى قالاسى اكىمدىگىنىڭ بەرگەن جاۋابى بويىنشا «تۇرعىن ءۇي قاتىناستارى تۋرالى» زاڭعا سايكەس، تۇرعىن ءۇيدى باسقارۋ نىسانىن تاڭداۋ تۋرالى شەشىم قابىلداۋ ءۇشىن تۇرعىندار كوپ پاتەرلى تۇرعىن ءۇيدىڭ پاتەرلەرىنىڭ، تۇرعىن ەمەس ءۇي- جايلارىنىڭ مەنشىك يەلەرىنىڭ جينالىسىن وتكىزىپ، كوندومينيۋم وبەكتىسىن سايلاۋعا مىندەتتى.
«ولار مىناداي فورمالار بولۋى مۇمكىن:
1) مۇلىك يەلەرىنىڭ بىرلەستىگى - كوپپاتەرلى ءبىر تۇرعىن ءۇيدىڭ پاتەرلەرىنىڭ، تۇرعىن ەمەس ءۇي- جايلارىنىڭ مەنشىك يەلەرى قۇرعان، كوندومينيۋم وبەكتىسىن باسقارۋدى جۇزەگە اسىراتىن، ونى ۇستاۋدى قارجىلاندىراتىن جانە ونىڭ ساقتالۋىن قامتاماسىز ەتەتىن كوممەرتسيالىق ەمەس ۇيىم بولىپ تابىلاتىن زاڭدى تۇلعا.
2) كوپ پاتەرلى تۇرعىن ءۇيدىڭ جاي سەرىكتەستىگى - قىزمەتىن ق ر ازاماتتىق زاڭناماسىنا سايكەس جاسالعان بىرلەسكەن قىزمەت تۋرالى شارت نەگىزىندە جۇزەگە اسىرادى. بۇل رەتتە پاتەرلەردىڭ، تۇرعىن ەمەس ءۇي- جايلاردىڭ مەنشىك يەلەرى كوندومينيۋم وبەكتىسىن باسقارۋ نىساندارىن تاڭداۋدا جانە وزگەرتۋگە ەرىكتى. سونىمەن قاتار، كوممۋنالدىق قىزمەت كورسەتەتىن ۇيىمدار تولەم بولماعان، سونداي- اق، شارتتا بەلگىلەنگەن مەرزىمدە تولىق تولەم بولماعان جاعدايدا، قىزمەتتەردى تولىق نەمەسە ءىشىنارا كورسەتۋدى توقتاتادى. ايتۋ كەرەك، تۇرعىن ءۇي قۇقىقتىق قاتىناستاردان تۋىندايتىن داۋلاردى زاڭنىڭ 8-بابىنا سايكەس، سوت شەشەدى»، - دەلىنەدى اكىمدىكتىڭ بەرگەن جاۋابىندا.
ەسكە سالساق، بۇعان دەيىن الماتىداعى پيك جەتەكشىلەرى م ي ب قىزمەتىنە كەدەرگى كەلتىرىپ وتىرعانىن جازعان ەدىك.
اۆتور: دۋمان ارعىنگەلدى
