دانيال احمەتوۆ شىعىس قازاقستان وبلىسىن تاعى ءبىر جىل باسقارادى
بۇل جايلى مەملەكەت باسشىسىنىڭ باسپا ءسوز حاتشىسى رۋسلان جەلبىداي الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات ءتىلشىسى.
«بۇگىن پرەزيدەنتتىڭ جارلىعىنا سايكەس دانيال كەنجەتاي ۇلى احمەتوۆتىڭ مول تاجىريبەسى ەسكەرىلىپ، ونىڭ قىزمەتتىك وكىلەتتىگى ءبىر جىلعا ۇزارتىلدى»، - دەپ جازدى ول.
ايتا كەتسەك، ەكونوميكا عىلىمدارىنىڭ دوكتورى، اكادەميك دانيال احمەتوۆ پاۆلودار وبلىسىنىڭ اكىمى، ق ر پرەمەر-ءمينيسترى، ق ر قورعانىس ءمينيسترى قىزمەتتەرىن اتقارعان. ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم جونىندەگى القا مۇشەسى بولدى. 2014-جىلدان بەرى شىعىس قازاقستان وبلىسىنىڭ اكىمى قىزمەتىن اتقارىپ كەلەدى.
ەستەرىڭىزگە سالساق، جاڭادان قۇرىلعان اباي وبلىسىنىڭ اكىمى لاۋازىمىنا نۇرلان ۇرانحايەۆتىڭ تاعايىندالعانىن حابارلاعان ەدىك.
پرەزيدەنت اكىمشىلىگىنىڭ باسشىسى مۇرات نۇرتىلەۋ سەمەي قالاسىندا ءوڭىردىڭ بارلىق دەڭگەيدەگى ءماسليحاتتارىنىڭ جيىنىنا قاتىسىپ، اباي وبلىسىنىڭ اكىمى لاۋازىمىنا ۋرانحايەۆ نۇرلان تەلمان ۇلى مەن سمايىلوۆ اسحات سايداحمەت ۇلىنىڭ كانديداتۋرالارىن ۇسىنۋ تۋرالى مەملەكەت باسشىسىنىڭ حاتىن وقىپ بەرگەن بولاتىن. اشىق داۋىس بەرۋ ناتيجەسىندە 25 دەپۋتات اسحات سمايىلوۆقا، 89 دەپۋتات نۇرلان ۋرانحايەۆقا داۋىس بەردى.
