09:57, 12 - ماۋسىم 2022 | GMT +6
ءىلبىستىڭ التىن-ەمەل ۇلتتىق پاركىندە تۇسىرىلگەن سيرەك كەزدەسەتىن سۋرەتتەرى جاريالاندى
نۇر-سۇلتان. قازاقپارات - حالىقارالىق قار بارىستارى قورىنىڭ ديرەكتورى ارمان قاشقىنبەكوۆ ءوزىنىڭ Facebook پاراقشاسىندا ءىلبىستىڭ سيرەك كەزدەسەتىن سۋرەتتەرىن جاريالادى، دەپ حابارلايدى قازاقپارات.
اۆتور سۋرەتتەردىڭ الماتى وبلىسىنداعى التىن-ەمەل ۇلتتىق تابيعي پاركىندە 50 مەتر قاشىقتىقتان تۇسىرىلگەنىن ايتادى.
«تۇڭعىش رەت ءىلبىس التىن-ەمەل ۇلتتىق تابيعي پاركىندە قامىستاردىڭ اراسىندا 50 مەتر قاشىقتىقتان ءتۇسىرىلدى. تۇركى الەمى ءۇشىن قار بارىسى جىلىنداعى كەرەمەت جاڭالىق. حالىقارالىق قار بارىسى قورى قازاقستاندىقتاردى وسى وقيعامەن قۇتتىقتايدى جانە ۇلتتىڭ سيمۆولىن قورعاۋعا باعىتتالعان جۇمىستاردى جالعاستىرا بەرمەك»، - دەپ جازدى ارمان قاشقىنبايەۆ.
وسىعان دەيىن «كولساي كولدەرى» ۇلتتىق پاركىنە قويىلعان فوتوتۇزاققا ءىلبىستىڭ ۇرعاشىسى مەن 1 جاستاعى الانى ءتۇسىپ قالعان ەدى.
