ءاليحان سمايىلوۆ الماتى وبلىسىنىڭ جاڭا اكىمىن تانىستىردى
ءاليحان سمايىلوۆ ءوز سوزىندە پرەزيدەنت ۇسىنعان جاڭا رەفورمالار اياسىندا جانە وتكەن رەفەرەندۋمنىڭ ناتيجەلەرى بويىنشا ەلىمىزدىڭ ساياسي جۇيەسىندە ماڭىزدى وزگەرىستەر بولعانىن اتاپ ءوتتى.
ماسەلەن، جاڭا نورما قابىلدانىپ، ەندى وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اكىمدەرىن تاعايىنداۋ جاڭا، اشىق جانە باسەكەگە قابىلەتتى فورماتتا وتەدى.
ءاليحان سمايىلوۆ دەپۋتاتتارعا ق ر پرەزيدەنتىنىڭ الماتى وبلىسىنىڭ اكىمى لاۋازىمىنا باتىرجان بايجۇمانوۆ پەن مارات سۇلتانعازيەۆتىڭ كانديداتۋرالارىن قاراۋعا ەنگىزۋ تۋرالى حاتىن وقىپ بەردى.
اشىق داۋىس بەرۋ ناتيجەسى بويىنشا 188 دەپۋتاتتىڭ 129 ى مارات سۇلتانعازيەۆتىڭ كانديداتۋراسىنا، 59 دەپۋتات باتىرجان بايجۇمانوۆقا داۋىس بەردى.
وبلىس اكتيۆىنە مارات سۇلتانعازييەۆتى تانىستىرا وتىرىپ، ءاليحان سمايىلوۆ ق ر پرەزيدەنتى ءوڭىر باسشىلىعىنىڭ الدىنا ءبىرقاتار ماڭىزدى مىندەتتەر قويعانىن، ونىڭ ىشىندە وبلىستىڭ باسقارۋ ورگاندارىن قونايەۆ قالاسىنا كوشىرۋ، ودان ءارى ەكونوميكالىق دامۋ جانە الەۋمەتتىك پروبلەمالاردى شەشۋ جونىندەگى مىندەتتەردى بەلگىلەپ بەرگەنىن اتاپ ءوتتى.
«ءبىزدىڭ نەگىزگى ماقساتىمىز - ازاماتتاردىڭ ءال-اۋقاتىن ارتتىرۋ، الەۋمەتتىك جاعدايىن جاقسارتۋ. ول ءۇشىن جاڭا ينۆەستيتسيالىق جوبالاردى ىسكە اسىرۋ ارقىلى جاڭا جۇمىس ورىندارىن اشۋ كەرەك. وبلىس اكىمى ءىرى ينۆەستورلاردى تارتۋ ءۇشىن قولايلى جاعدايلار جاساۋعا جانە قولدانىستاعى يندۋستريالىق ايماقتاردىڭ الەۋەتىن بارىنشا پايدالانۋعا ەرەكشە نازار اۋدارۋى كەرەك»، - دەدى پرەمەر-مينيستر.
سونداي-اق ۇكىمەت باسشىسى ءوڭىردىڭ اۋماقتىق ورنالاسۋ ارتىقشىلىقتارىن بارىنشا پايدالانىپ، اۋىل شارۋاشىلىعى ونىمدەرىن ءوندىرۋ مەن قايتا وڭدەۋدى دامىتۋ، الماتى ماڭىندا ازىق-تۇلىك بەلدەۋىن قۇرۋ قاجەتتىگىن اتاپ ءوتتى.
سونىمەن قاتار ءاليحان سمايىلوۆ وبلىستىڭ تۋريستىك كلاستەردى دامىتۋ الەۋەتى دە جوعارى ەكەنىن اتاپ ءوتتى. ول ءوڭىردىڭ ەكونوميكالىق ءوسۋىنىڭ نەگىزگى درايۆەرلەرىنىڭ ءبىرى بولا الادى.
«حالىقتى ساپالى اۋىز سۋمەن، تابيعي گازبەن قامتاماسىز ەتۋ، ەلەكترمەن جابدىقتاۋ، جولدار مەن الەۋمەتتىك نىسانداردى جاڭعىرتۋ، تۇرعىن ءۇي پروبلەمالارىن شەشۋ جانە مەكتەپتەردە ءۇش اۋىسىممەن وقىتۋدى جويۋ جونىندەگى جۇمىستى جالعاستىرۋدىڭ ماڭىزى زور»، - دەدى پرەمەر-مينيستر.
سونىمەن قاتار ۇكىمەت باسشىسى جەرگىلىكتى اتقارۋشى ورگانداردىڭ جۇمىسى حالىقپەن ءتيىمدى ديالوگقا نەگىزدەلۋى ءتيىس ەكەنىن اتاپ ءوتتى.
