پەتروپاۆلداعى جازاسىن وتەۋشىلەر ليمون، ماندارين، ءجۇزىم ءوسىرىپ جاتىر
سولتۇستىك قازاقستان وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ ە س 164/6 مەكەمەسىندە 4 جىل بۇرىن جىلىجاي اشىلدى. وسىلايشا مەكەمە ءوزىن قيار، قىزاناق جانە بولگار بۇرىشىمەن تولىق قامتىپ وتىر، ارتىلعانى ساتىلادى. قياردان عانا اپتاسىنا 160 كەلىگە دەيىن ءونىم الىنادى. ال بولگار بۇرىشىنىڭ بىرەۋىنىڭ سالماعى جارتى كەلىگە دەيىن بارادى ەكەن. ەندى مۇندا جەمىس اعاشتارى دا پايدا بولدى.
مەكەمەدە جازاسىن وتەپ جۇرگەن ولەسيا رۋساك جىلىجايدا ەڭبەك ەتەدى. باعباندىقتى وسىندا ۇيرەنگەن كەلىنشەك بىلتىر قىستا ءجۇزىم، ليمون، ماندارين جەمىستەرىنىڭ ءدانىن جەرگە ءسىڭىرىپ، باپتاۋعا كىرىسەدى. ەڭبەگى ەش بولماي وسكىندەر شىقتى. ەندى جەمىس اعاشتارىنىڭ كۇتىمى تۋرالى كەلىنشەك ءبىلىمىن ارنايى كىتاپتاردان جەتىلدىرىپ ءجۇر.
«بۇل جەمىستەردى ءوسىرۋ ءۇشىن ەڭ باستىسى جىلى جانە كۇن بولۋى قاجەت. جىلىجايىمىز پوليكاربوناتتان جاسالعان، ول كۇن ساۋلەسىن ەسەلەي تۇسەدى. سول سەبەپتى جاقسى ءوسىپ جاتىر. ۋاقىتىندا سۋارۋ كەرەك، ال ليمونعا، سونداي-اق سۋ بۇركۋ قاجەت. ال جەمىس بەرۋى ءۇشىن ولاردى تەلۋ كەرەك، سوندا عانا ءونىم بەرە باستايدى»، - دەيدى ولەسيا رۋساك.
مەكەمە اۋماعىندا شاعىن فەرما دا ورنالاسقان. مۇندا تاۋىق پەن قويان وسىرەدى، جىلقى ۇستايدى. ەندى ساندىك قوياندار دا پايدا بولدى.
«كاسىپكەر ۇيدە ۇستايتىن ساندىك قوياننىڭ بىرەۋىن اكەلدى. ونى ءبىز وزىمىزدەگى قوياندارمەن كوبەيتتىك. ادەمى، كوزدەرى ادەتتەگىدەي قىزىل ەمەس، كوكشىل، قارا بولىپ كەلەدى. ولارعا قاجەت جەمازىقتى دا ءوزىمىز وسىرەمىز. گيدروپونيكا ادىسىمەن وسىرىلەتىن ءشوپتىڭ قۇرامىندا 16 ءتۇرلى دارۋمەن بار. سول سەبەپتى جانۋارلار ونى ءسۇيسىنىپ جەيدى. ءبىز فەرماداعى قوياندارعا بۇل ءشوپتى كۇنىنە 2 رەت بەرەمىز»، - دەيدى ولەسيا رۋساك.
قازىرگى ۋاقىتتا مەكەمەدە 200 دەن اسا كەلىنشەك جازاسىن وتەپ جاتىر. سونىڭ %95 جۇمىسپەن قامتىلعان. ەڭبەكاقىلار 40 مىڭ تەڭگەدەن جوعارى.
«مۇنداعى سوتتالعانداردىڭ باسىم بولىگى، ياعني 140 ايەل «ەڭبەك قىزىلجار» ج ش س- دە تىگىنشى بولىپ ەڭبەكتەنەدى. ولار ارنايى كيىم، توسەك ورىن تىگەدى. جالپى مەكەمە اۋماعىندا 3 كاسىپكەر جۇمىس ىستەيدى، ءبىرى تىگىنشىلىكپەن اينالىسسا، ەكىنشىسى قۇرىلىس ماتەريالدارىن شىعارادى، قۇس-قويان ءوسىرىپ، جىلىجاي ۇستايدى، وسىلايشا 5 ادامدى جۇمىسپەن قامتىپ وتىر، ءۇشىنشىسى ويىنشىق قونجىقتار تىگەدى، ول جەردە 4 ادام جۇمىس ىستەيدى. جازاسىن وتەۋشىلەر ەڭبەكاقىسىنىڭ جارتىسى قارىزدارىن وتەۋگە كەتسە، قالعانىن وزدەرىنىڭ كەرەك-جاراقتارىنا جۇمساي الادى، تۋعان-تۋىستارىنا، بالالارىنا كومەكتەسەدى»، - دەيدى ەس-164/6 مەكەمەسى باستىعىنىڭ ورىنباسارى گۇلنار سىزدىقوۆا.
