22:45, 10 - ماۋسىم 2022 | GMT +6
جاپونيادا روبوت ساۋساعى ادام جاسۋشاسىمەن قاپتالدى
نۇر-سۇلتان. قازاقپارات - جاپون عالىمدارى ساۋساعى ادام جاسۋشاسىمەن قاپتالعان روبوت جاساپ شىقتى، دەپ حابارلايدى «حابار 24».
جاپوندىق عالىمدار روبوتتىڭ ساۋساعىن ادام جاسۋشالارىنان جاساپ شىعاردى. بۇعان دەيىن بۇل ماقساتتا سيليكون قولدانىلاتىن.
ءبىراق ماماندار جاساندى سانانىڭ مۇمكىندىكتەرىن ارتتىرۋدى ءجون كورگەن.
ماسەلەن، ناۋقاستارعا كۇتىم جاسايتىن روبوتتاردىڭ دەنەسىن سيليكون ەمەس، ادامدىكىنە ۇقساس سەزىمتال تەرى قاپتاعان دۇرىس دەيدى.
شودجي تاكەۋچي، توكيو ۋنيۆەرسيتەتىنىڭ پروفەسسورى: - ادام جاسۋشىلارىنان جاسالعان تەرىنىڭ سەزىمتالدىعى جوعارى بولادى. ول سونداي-اق وزدىگىنەن قالپىنا كەلۋ قاسيەتىنە دە يە. ازىرگە بۇل ەڭ قاراپايىم ۇلگى سانالادى. الايدا بولاشاقتا ونى جەتىلدىرەمىز.
