نە ءۇشىن تاماق جەي بەرگىڭىز كەلەدى؟

نۇر-سۇلتان. قازاقپارات - قارىن اشۋ - اعزانىڭ قالىپتى جاعدايى. ءبىراق بۇل سەزىمدى وتە ءجيى جانە تاماق ىشكەننەن كەيىن كوپ ۇزاماي سەزسەڭىز، ول - ويلانۋعا سەبەپ.

اشتىق سەزىمىنىڭ فيزيولوگيالىق قانا ەمەس، پسيحولوگيالىق تا سەبەپتەرى بولۋى مۇمكىن.

قايتا-قايتا قارنىڭىز اشا بەرۋىنىڭ سەبەپتەرىن انىقتاپ كورەيىك.

1. ءتاتتى مەن جىلدام كومىرسۋلاردى كوپ جەيسىز

شوكولاد باتونچيگى، كەكس، پەچەنە جەۋ - قارىندى تويدىرۋدىڭ ەڭ وڭاي ءادىسى. ءبىراق ول ۇزاققا جەتپەيدى. قانت پەن جىلدام كومىرسۋلار قانداعى گليۋكوزا دەڭگەيىن ارتتىرادى جانە از ۋاقىتقا ەنەرگيا بەرەدى. ءبىراق سول سەكىلدى جىلدام كۇيىپ كەتەدى، قانت دەڭگەيى ءتۇسىپ، قايتادان قارنىڭىز اشادى. تاعى دا قارنىڭىز اشقاسىن قايتادان قانداي دا ءبىر دەسەرت جەيسىز.

مايلارعا، اقۋىزدارعا جانە كۇردەلى كومىرسۋلارعا باي ۇيلەسىمدى تاماقتانۋعا كوشىڭىز. كۇنىڭىزدى تويىمدى تاڭعى استان باستاۋعا تىرىسىڭىز. سول كەزدە تۇسكى اسقا دەيىن قارنىڭىز اشپايدى. ال تىسكەباسارلار رەتىندە جاڭعاقتار، جاسۇنىققا باي كوكونىستەر، يوگۋرت، ىرىمشىك، اۆوكادو جەڭىز.

2. ۇيىقتاۋعا كەش جاتاسىز

ۇيقى كەزىندە توقتىق جانە اشتىق سەزىمدەرىن باقىلايتىن لەپتين جانە گرەلين گورموندارى وڭدەلەدى. سولايشا، لەپتين ميعا تويۋ جايلى بەلگى جىبەرەدى. گرەلين، كەرىسىنشە، اشتىق سەزىمى جايلى اقپارات بەرەدى. ەگەر جەتكىلىكتى ۇيىقتاماساڭىز، لەپتين دەڭگەيى ازايىپ، ۇيرەنشىكتى تاماق مولشەرىنە تويعانىڭىزدى سەزبەيسىز. وعان جاۋاپ رەتىندە گرەلين كۇشەيە تۇسەدى. ناتيجەسىندە، كوپ تاماق جەيسىز، ءبىراق سوندا دا كوپ ۇزاماي قارنىڭىز اشادى. ۇيقى قانباعان سايىن تابەتىڭىز ارتا بەرەدى.

توسەككە 23:00 گە دەيىن جاتىڭىز جانە 7-8 ساعاتتان از ۇيىقتاماڭىز. دۇرىس دەمالۋعا كەدەرگى جاسايتىن نارسەلەردىڭ ءبارىن الىپ تاستاڭىز. تەرەزەگە قالىڭ جاپقىش ءىلىڭىز. ۇيىقتاۋعا ءبىر ساعات قالعاندا بارلىق گادجەتتەردى ءسوندىرىڭىز.

3. كوفە مەن الكوگولدى كوپ ىشەسىز

كوفەين مەن ءسپيرتتى ونىمدەر قاجەتتىدەن ءسىزدى كوبىرەك تاماق جەۋگە يتەرمەلەپ، تابەتتى ىنتالاندىرادى. وعان قوسا، الكوگول بوساڭسىتىپ، باقىلاۋ سەزىمىن باسەڭدەتەدى.

ەگەر تاماقتى ازىراق جەگىڭىز كەلسە، كوفەنى تەك تاڭەرتەڭ ءىشىڭىز جانە الكوگولمەن اباي بولىڭىز.

4. شولدەيسىز

ادامدار اشتىق سەزىمىن ءجيى شولدەۋمەن شاتاستىرادى. كوپشىلىك سۋدى سۇيىق تاماقپەن اۋىستىرۋعا ۇيرەنىپ قالدى، سوندىقتان ارالىق مي بولىمىندە ءشول مەن اشتىق ورتالىقتارىنىڭ اراسىندا جاڭىلىس بولادى. بىردەڭە جەگىڭىز كەلۋى اعزانىڭ سۋسىزدانعانىن ءبىلدىرۋى مۇمكىن.

كۇندى ءبىر-ەكى ستاقان سۋ ىشۋدەن باستاڭىز. بوتەلكەگە سۋ قۇيىپ الىپ، ونىڭ كۇنى بويى قول استىڭىزدا بولۋىن قاداعالاڭىز. ءار تاماق ىشەر الدىندا ءبىر ستاقان سۋ ءىشۋ دە پايدالى.

5. ءسىز كۇيزەلىستەسىز

ادرەنالين جانە كورتيزول كۇيزەلىس گورموندارى ميعا سىزگە ءقاۋىپ ءتونىپ تۇرعانى جايلى، ياعني ءسىزدى قۇتقارۋ ءۇشىن ەنەرگيا قاجەت ەكەنى جايلى بەلگى بەرەدى. ناتيجەسىندە تابەتىڭىز ارتا تۇسەدى.

سەزىمدەرىڭىزدى قولعا الۋدىڭ ءادىسىن تابىڭىز. مىسالى، يوگامەن اينالىسىڭىز نەمەسە مەديتاتسيا جاساپ ۇيرەنىڭىز. تاماق كۇيزەلىستەن قۇتقارمايدى.

6. سەزىمدەردى تاماقپەن باساسىز

كەيدە ءبىز قارىن اشۋدى ءتۇرلى سەزىمدەرمەن شاتاستىرامىز: ءىش پىسۋ، مۇڭايۋ، شارشاۋ، مازاسىزدانۋ. مۇنداي كەزدە بۋرگەر نەمەسە بالمۇزداق ونى باساتىنداي كورىنەدى. تاماقتى جاعىمدى ىستەرمەن الماستىرىڭىز. كوڭىل كۇيىڭىز تۇسسە، جاقىن ادامىڭىزعا قوڭىراۋ شالىڭىز نەمەسە كومەديا قاراڭىز. شارشاساڭىز، ۆانناعا ءتۇسىڭىز.

7. الاڭدايسىز

كومپيۋتەر، تەلەديدار الدىندا نەمەسە الەۋمەتتىك جەلىلەردە وتىرىپ تاماق ىشسەڭىز، قالاي بارلىق پورتسيانى تاۋىسىپ قويعانىڭىزدى بايقاماي قالاسىز. مي تاماق كولەمى جانە تويعانى جايلى دۇرىس ەمەس اقپارات الادى دا، كوپ ۇزاماي قايتادان تاماق تۋرالى ويلاپ وتىراسىز.

تاماقتان ءلاززات الىڭىز جانە اسىقپاي تاماق ءىشۋدى ادەتكە اينالدىرىڭىز.

massaget.kz