سولتۇستىك قازاقستاندا ۇيىردەگى جىلقىلار تۇماۋمەن اۋىرىپ جاتىر-اكىم
بۇل تۋرالى وسى اۋداننىڭ اكىمى بريفينگتە ءمالىم ەتتى، دەپ حابارلايدى قازاقپارات ءتىلشىسى. وڭىرلىك كوممۋنيكاتسيالار قىزمەتىندە وتكەن بريفينگتە س ق و ەسىل اۋدانىنىڭ اكىمى مەدەت وسپانوۆ اتقارىلعان جۇمىستاردى قورىتىندىلاپ، تىلشىلەردىڭ سۇراقتارىنا جاۋاپ بەردى. جۋرناليستەر وسى اۋداننىڭ چيريكوۆكا ەلدى مەكەنىندە ۇيىردە اۋىرعان جىلقىلاردىڭ جايىن سۇرادى.
«ەكى اپتا بۇرىن ءبىر جىلقى ولگەن. ول جايىندا بىزگە حابارلاماعان. جىلقىشىلار يەسىن حاباردار ەتىپ، ەكى جاق ءوزارا كەلىسكەن. ونىڭ نەدەن ولگەنى بەلگىسىز، ءبىز ولەكسەسىن كورگەن جوقپىز. جىلقى اۋىرىپ جاتىر دەگەن حابار جەتىسىمەن وقيعا ورنىنا باردىق، ۆەتەرينارلار مالدان ساراپتاما الىپ، نۇر- سۇلتان قالاسىنا ۆەتەريناريانىڭ ۇلتتىق رەفەرەنت ورتالىعىنا جىبەردى. مال جىلقى تۇماۋىمەن اۋىرىپ جاتىر»، - دەيدى مەدەت وسپانوۆ.
چيريكوۆكا ەلدى مەكەنى ماڭىندا باعىلىپ جۇرگەن ۇيىردە 380 جىلقى بار. اۋدان اكىمىنىڭ ايتۋىنشا، ءبارى بىردەي اۋىرىپ جاتقان جوق، اراسىندا ون شاقتىسى عانا جوتەلىپ، تاناۋىنان سۋ اققان. «ءبىز جىلقى يەلەرىن جيناپ، سويلەستىك. تۇرعىندار ءوز قاراجاتىنا انتيبيوتيك الدى. ءۇيىر باسىندا بەكەت قۇرىپ، ۆەتەرينارلار مالعا ەكپە جاسادى. باسقا وكرۋگتەرگە، اۋىلدارعا حابارلاستىق، ولاردا اۋرۋ تىركەلگەن جوق»، - دەيدى اۋدان اكىمى.
اۆتور: اقەركە داۋرەنبەك قىزى
