بايقوڭىرداعى رەسەيلىك مەكتەپتەرگە قازاق ءتىلى مەن ادەبيەتى، قازاقستان تاريحى پاندەرىن ەنگىزۋ جوسپارلانۋدا
عارىش كەشەنىن جالعا الۋ جاعدايىندا ەرەكشە مارتەبەگە يە بايقوڭىر قالاسىندا قازاقستاندىق جانە رەسەيلىك ەكى ءبىلىم بەرۋ جۇيەسى جۇمىس ىستەيدى. قالادا ورنالاسقان قازاق تىلىندە وقىتاتىن 5 مەكتەپ قىزىلوردا وبلىسىنىڭ قارماقشى اۋداندىق ءبىلىم بولىمىنە قارايدى. رەسەيدىڭ ءبىلىم مينيسترلىگىنە ورىس تىلىندە وقىتاتىن 7 مەكتەپ قارايدى. قازاقستاندىق ءبىلىم بەرۋ ۇيىمدارىنىڭ باسشىلارىمەن كەزدەسۋ بارىسىندا وبلىستىق ءبىلىم باسقارماسى باسشىسىنىڭ مىندەتىن اتقارۋشى باعدات بەرداۋلەتوۆ بايقوڭىر قالاسىنىڭ ءبىلىم بەرۋ جۇيەسىنىڭ نەگىزگى ماسەلەلەرى تۋرالى باياندادى.
«بايقوڭىرداعى رەسەي مەكتەپتەرىندە قازاقستان تاريحى، قازاق ءتىلى مەن ادەبيەتى پاندەرىن وقىتۋ ماسەلەلەرىن ەكىجاقتى ۇكىمەتارالىق كوميسسيا پىسىقتاۋدا»، - دەپ اتاپ ءوتتى ول.
سونداي- اق، وبلىس اكىمى قىزىلوردا وڭىرىندەگى ۇزدىكتەردىڭ ءبىرى سانالاتىن №277 مەكتەپ- ليتسەيىنىڭ وزىق جوبالارىمەن جانە جەتىستىكتەرىمەن تانىستى.
