تۇركيا ۋكراينادان استىق تاسىمالداۋ ءۇشىن قارا تەڭىزدە «ءدالىز» قۇرۋدى قۇپتايدى
تۇركيا سىرتقى ىستەر ءمينيسترى ميەۆليۋت چاۆۋشوگلۋ رەسەيلىك ارىپتەسى سەرگەي لاۆروۆپەن كەزدەسۋىنەن كەيىن وسىلاي دەپ مالىمدەدى.
ايتۋىنشا، سوڭعى كۇندەردەگى مالىمدەمەلەر رەسەي مەن ۋكراينا اراسىنداعى كەلىسسوزدەر ۇدەرىسىنە قايتا ورالۋعا ءۇمىت بەرەدى. سونداي- اق تاراپتار ۋكرايناداعى جاعداي مەن وڭىرلىك ماسەلەلەردى تالقىلادى. سونىڭ ىشىندە سيريا، اۋعانستان مەن ليۆياداعى احۋالدى قاراستىردى. ولار سيريا ماسەلەسىن الداعى ۋاقىتتا استانا پروتسەسىندە تالقىلايتىنىن ايتادى.
ميەۆليۋت چاۆۋشوگلۋ، تۇركيانىڭ سىرتقى ىستەر ءمينيسترى:
- بىرىككەن ۇلتتار ۇيىمى مەن رەسەي، ۋكراينا، تۇركيا اراسىندا كەمە تەكسەرەتىن مەحانيزم ءارى ىنتىماقتاستىق جوسپارىن قۇرۋعا بولادى. مۇنى ەكى ەل دە، رەسەي دە، ۋكراينا دا قابىلداۋى كەرەك. ءبىز بىرىككەن ۇلتتار ۇيىمىنىڭ ۇسىنىسىمەن وسى جايتتى تالقىلاۋ ءۇشىن ىستامبۇلدا كەزدەسۋدى ۇسىندىق.
رەسەي سىرتقى ىستەر ءمينيسترىنىڭ ايتۋىنشا، ۋكراينا استىعىنا قاتىستى جاعدايدىڭ ازىق- تۇلىك داعدارىسىنا ەش قاتىستى جوق. دەگەنمەن، رەسمي كرەمل ىستامبۇلدا كەزدەسۋگە دايىن.
سەرگەي لاۆروۆ، رەسەيدىڭ سىرتقى ىستەر ءمينيسترى:
- ءبىز ۋكراين استىعىن جونەلتۋ ماسەلەسىنە كوپ كوڭىل بولدىك. بۇل جايتتى ۋكرايندىقتاردىڭ وزىمەن بىرگە باتىستاعى ارىپتەستەرىمىز دە جاھاندىق اپات ساناتىنا جاتقىزۋعا تىرىسىپ جاتىر. دەگەنمەن، ۋكراين استىعىنىڭ ۇلەسى دۇنيە جۇزىندەگى استىق ءوندىرىسىنىڭ ءبىر پايىزىنان از. دەمەك، ۋكراينا استىعىنا قاتىستى قازىرگى جاعدايدىڭ ازىق- تۇلىك داعدارىسىنا ەش قاتىسى جوق. بۇل تۋرالى پرەزيدەنت پۋتين ءبىر اپتا بۇرىن بەرگەن سۇحباتىندا ايتتى.
www.24.kz
