قازاقستان ءۇشىن ەنەرگەتيكا سالاسىن جاڭعىرتۋ ايقىنداۋشى مانگە يە – پرەزيدەنت
بۇل تۋرالى ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 34-جالپى وتىرىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ءبىز شىنايى نارىقتىق ەركىندىك پەن باسەكەلەس ەكونوميكا قۇرۋعا باعىتتالعان ەلدىڭ جاڭا ەكونوميكالىق باعدارىن جۇزەگە اسىرىپ جاتىرمىز. وسىعان وراي ينۆەستيتسيالىق احۋالدى جۇيەلى تۇردە جاقسارتۋعا ەرەكشە نازار اۋدارامىز»، - دەدى قازاقستان پرەزيدەنتى.
مەملەكەت باسشىسى بۇگىنگى كەڭەس وتىرىسىنىڭ تاقىرىبى ەكونوميكانى دەكاربونيزاتسيالاۋعا جانە تومەن كومىرتەكتى تەحنولوگيالاردى ەنگىزۋگە ارنالعانىن اتاپ ءوتتى.
«بۇل ماسەلە بۇرىن- سوڭدى وسىنشاما وزەكتى بولعان ەمەس. كليماتتىق وزگەرىستەردىڭ سەزىلۋى، ونىڭ ىشىندە اۋا تەمپەراتۋراسىنىڭ جوعارىلاۋى بۇكىل الەمدە بايقالادى. ساراپشىلاردىڭ بولجامى كوڭىل كونشىتپەيدى. استىق ءتۇسىمىنىڭ جانە سۋ رەسۋرستارىنا قولجەتىمدىلىكتىڭ تومەندەۋ قاتەرى بار. مۇنىڭ بارلىعى كىدىرىسسىز جۇيەلى ءىس- شارالار قابىلداۋدى تالاپ ەتەدى. بۇگىندە قازاقستاندا پارنيكتى گاز شىعارىندىلارىنىڭ 80 پايىزى قازبالى وتىنمەن ەنەرگيا وندىرۋگە بايلانىستى. وسىناۋ نەگىزگى فاكتور ەلدىڭ كليماتىنا تەرىس اسەرىن تيگىزەدى. سوندىقتان ەنەرگەتيكا سالاسىن جاڭعىرتۋ ءبىز ءۇشىن ايقىنداۋشى مانگە يە»، - دەدى قاسىم- جومارت توقايەۆ.
اۆتور: مارلان جيەمباي
