تاسجولدى جوندەۋدەن كەيىن الماتىدان نۇر-سۇلتانعا قانشا ساعاتتا جەتۋگە بولاتىنى ايتىلدى

جوندەۋدەن كەيىن ەكى مەگاپوليس اراسىنداعى جول قانشا ۋاقىت الادى؟ بۇل تۋرالى Tengrinews.kz ءتىلشىسى «قازاۆتوجول» باسشىسى مەيىرحات قاسىمبايەۆتان سۇراعان.

2013 -جىلى الماتى- نۇر-سۇلتان تاسجولى رەتكە كەلتىرىلە باستادى. سول كەزدە الماتىدان قونايەۆقا (بۇرىنعى قاپشاعاي - ەسك. ) دەيىنگى بولىكتى قايتا جوندەدى. كەيىن قۇرىلىسشىلار باسقا ۋچاسكەلەردى دە جوندەۋگە كىرىستى. وسى ۋاقىتقا دەيىن جولدىڭ ءبىر بولىگى اشىق بولدى، ال قالعان بولىگىندە قۇرىلىس جۇمىستارى ءجۇرىپ جاتىر.

«بۇل - ەلدىڭ ءىرى جانە نەگىزگى كولىك ارتەريالارىنىڭ ءبىرى. جوبا باستالعاننان بەرى وندا شامامەن 50 ميلليون توننا قۇرىلىس ماتەريالدارى جۇمسالدى. شەشىلمەگەن ماسەلەلەر، ارينە، بار، قازىر ولاردى شەشۋ ءۇشىن بەلسەندى جۇمىس ىستەپ جاتىرمىز.

اتاپ ايتقاندا، قاراعاندىدان بالقاشقا دەيىنگى ۋچاسكە بويىنشا كەلىسىمشارتتار جاساسۋ كەزىندە پروبلەمالار تۋىندادى. وسىعان بايلانىستى وندا جۇمىس دۇرىس جۇرگىزىلگەن جوق. ءقازىر ءبىز مەملەكەتتىك ءاۋديتتى تەكسەرۋگە باستاماشىلىق جاسادىق، ونىڭ قورىتىندىسى بويىنشا وسى ۋچاسكەنى قالاي اياقتايتىنىمىز تۋرالى شەشىم قابىلداناتىن بولادى. كىشكەنە شىدامدىلىق تانىتۋلارىڭىزدى سۇرايمىز».

جوبا بىرنەشە ۋچاسكەلەرگە بولىنگەن. قاراعاندىدان بالقاشقا دەيىنگى ارالىقتان باسقا، الدىمىزدا بالقاش- بۋرىلبايتال، بۋرىلبايتال- كۇرتى جانە كۇرتى- قاپشاعاي ۋچاسكەلەرىن اياقتاۋ جۇمىسى تۇر.

«ءار ۋچاسكەنىڭ ءوز كەلىسىمشارتى بار. مەردىگەرلەردىڭ ءبىرى ءوز بولىگىن 2022 -جىلعا دەيىن، ال ەكىنشى ءبىرى 2023 -جىلعا دەيىن اياقتاۋى كەرەك. دەگەنمەن، ءبىز ەكى مەگاپوليس اراسىنداعى بارلىق جولدى 2024 -جىلدىڭ سوڭىنا دەيىن اشىپ، پايدالانۋعا بەرۋىمىز كەرەك. ياعني 2025 -جىلدان باستاپ جۇرگىزۋشىلەر وسى اۆتوجول بويىنشا كەدەرگىسىز جانە توقتاۋسىز ءجۇرۋى ءتيىس. ءبىز وسى جوسپاردى ۇستانامىز جانە ودان اۋىتقىماۋ ءۇشىن بار كۇشىمىزدى سالۋعا تىرىسامىز»، - دەدى قاسىمبايەۆ.

ەلىمىزدىڭ باستى ماگيسترالدارىنىڭ ءبىرى بىردەن ءتورت وبلىستىڭ اۋماعىندا ورنالاسقان: الماتى، جامبىل، قاراعاندى جانە اقمولا. «قازاۆتوجول» مالىمەتىنشە، بارلىق جولدى رەكونسترۋكتسيادان كەيىن 12-13 ساعات ىشىندە ءجۇرىپ وتۋگە بولادى.

«الماتى مەن نۇر-سۇلتان اراسىنداعى جولدىڭ ۇزىندىعى 1100 شاقىرىم بولادى. بۇل - «1ب» ساناتىنداعى جول. ءار ۋچاسكەدە ساعاتىنا 110, 130 جانە 150 شاقىرىم جىلدامدىق شەكتەۋلەرى بار. بۇرىلىستار تۋرالى، سونداي-اق، جولدىڭ باسقا دا نيۋانستارىن ۇمىتپاۋ كەرەك. بۇل ماسەلەلەر شەشىلسە، كولىكپەن ءجۇرۋ شامامەن 12-13 ساعاتتى الادى»، - دەپ قورىتىندىلادى «قازاۆتوجول» باسشىسى.